UEFA bir neçə top-klubu cərimələyib. Qitənin futbol qurumu “maliyyə feyr-pleyi” qaydalarını pozduğuna görə sanksiyaya əl atıb.

UEFA-nın mətbuat xidmətinin məlumatında maliyyə pozuntularına görə “Çelsi”, “Roma”, “Barselona”, “Lion” və “Aston Villa”ya sanksiyalar tətbiq olunub. Ən ağır cərimə “Çelsi”yə kəsilib. London klubu UEFA-nın xəzinəsinə 20 milyon avro ödəniş etməli olacaq.

Bundan əlavə, “zadəganlar”a 60 milyon avro şərti cərimə də tətbiq olunub. İngiltərə klubu UEFA ilə dörd il müddətinə nəzarət rejiminə razılıq verib.

“Barselona” oxşar səbəblərə görə 15 milyon avro cərimələnib. İspaniya klubu əlavə olaraq 45 milyon avro şərti cərimə ilə də üzləşib. UEFA sanksiyaya “Barselona”nın 2023 və 2024-cü illərlə bağlı hesabatlarında maliyyə dayanıqlılığı baxımından pozuntular aşkarlandığını əsas göstərib. Kataloniya klubunun rəhbərliyi də dörd il ərzində nəzarət müddətinə razılıq verib.

“Lion” 12,5 milyon avro, “Aston Villa” isə 5 milyon avro cərimələnib. Hər iki klub üçün də müvafiq olaraq 15 milyon və 12 milyon avroluq şərti cərimə nəzərdə tutulub. “Roma” isə 3 milyon avro məbləğində cərimələnib.

UEFA-nın məlumatında qeyd olunur ki, sanksiyalara əl atmaqda əsas məqsəd 2026/27 mövsümündən başlayaraq gəlirlərin bölgüsünə dair tələblərə tam şəkildə əməl etməkdi.