UEFA 2021/22 mövsümündə “maliyyə feyr-pleyi” qaydalarının mümkün pozuntularına görə 20 klubdan şübhələnir.

Bu səbəbdən klubların həmin mövsümdəki maliyyə əməliyyatları araşdırılır.

Qitə futbol təşkilatı tezliklə klublara qarşı sanksiyalar verə bilər. Cəzaların sentyabrda açıqlanması gözlənilir. İngiltərədə çıxan “The Times” qəzetinin məlumatına görə “Barselona”, “Yuventus”, “Milan” və “Roma” da daxil olmaqla 10 kluba qarşı aşağıdakı sanksiyalar tətbiq oluna bilər:

1. UEFA-nın bayrağı altında keçirilən turnirlərdə iştiraka qadağa.

2. Transfer və ya digər əməliyyatlara qadağa.

“Barselona” və “Yuventus” rəhbərliyi “maliyyə feyr-pleyi” mövzusunda UEFA ilə danışıq aparmaqdan boyun qaçırıb. “The Times” UEFA tərəfindən cəzalana biləcək klubların siyahısında “Arsenal”, PSJ və “Marsel”in olduğunu da yazıb. PSJ və “Marsel”in könüllü razılıq əsasında cərimələnəcəyi bildirilib.

UEFA-nın klublara maliyyə nəzarəti üzrə orqanı ötən ilin iyunundan PSJ-ni nəzarət altında saxlayır. Paytaxt klubunun əvvəlki üç maliyyə ilində 30 milyon avrodan çox itki ilə üzləşməsi təhqiqata rəvac verib. Buna görə parislilərin marsellilərlə müqayisədə daha ağır cəzaya məruz qalmaq ehtimalı var. İyulda Fransa mənbələri PSJ-nin 2021/22 mövsümündə təxminən 200-300 milyon avro, əvvəlki maliyyə ilində isə 225 milyon avro zərərə uğraması haqda məlumat yaymışdı. “Marsel”in maliyyə itkiləri bu rəqəmlərlə müqayisədə daha azdı. “The Times”a görə, Fransa klublarına münasibətdə cəzalar yalnız iqtisadi xarakter daşıyacaq. İstənilən halda Liqa 1-in son çempionu PSJ ilə vitse-çempion “Marsel” gələcəkdə daha ağır sanksiyalardan qaçmaq üçün növbəti üç mövsümdə maliyyə planında vəziyyətini yaxşılaşdırmalıdı.

“İnter” və “Roma”ya cərimə və transfer məhdudiyyətinin tətbiq edilmək ehtimalı yüksəkdi. Məlumatda bir sıra digər klubların cəzalanmayacağı, lakin müəyyən müddətdə nəzarət altında olacağı da bildirilib. İngiltərə qəzeti onu da qeyd edir ki, hələ ki bütün klublar ötən mövsümün maliyyə hesabatını UEFA-ya təqdim etməyib. Odu ki, şübhə doğuranlarla bağlı vəziyyət dəyişə bilər.

Qeyd edək ki, bu mövsüm UEFA-da mövcud “maliyyə feyr-pleyi” qaydaları ilə bağlı araşdırma sonuncu olacaq. 2023/24 mövsümündən başlayaraq klubların üzvlərinin maaşları, transferləri və transfer komissiyaları üzrə xərclərin faizinə nəzarət edəcək sistem tətbiq olunacaq. 2023-cü ildə bu planda yol verilən limit 90 faiz olacaq, 2024-cü ildə 80 faizə, 2025-ci ildə isə 70 faizə qədər azalacaq.

Yeri gəlmişkən, UEFA maliyyə qüdrətini bir qədər də artırmaq üçün ABŞ-ın televiziya şirkətləri ilə əməkdaşlığa başlayacaq. Qitə futbol qurumunun CBS, “Viacom” və “Paramount”la müqavilə bağlayacağını “As” qəzeti xəbər verib. İspaniyanın idman nəşrinin məlumatında bu şirkətlərlə bağlanacaq müqavilələrin ümumi dəyərinin 1,5 milyard dollar olacağı bildirilib. Sazişin 6 illiyə nəzərdə tutulduğu da qeyd edilib. Artıq razılaşdırılan müqavilənin şərtinə əsasən, televiziya şirkətləri Çempionlar Liqası da daxil olmaqla UEFA-nın bayrağı altında keçirilən turnirləri ABŞ ərazisində yayınlayacaqlar. “As” qəzeti CBS, “Viacom” və “Paramount”la müqavilənin hətta idman tarixində ən dəyərli anlaşmalar sırasına daxil olacağını da vurğulayıb.