Orkun Kökçü Türkiyədə hansi kluba azarkeşlik edir?
Mayın 25-də Albaniyanın paytaxtı Tiranada Konfrans Liqasının ilk qalibi məlum olacaq.
Həlledici görüşdə “Feyenoord”la “Roma” üz-üzə gələcək. Bu arada əla mövsüm keçirən rotterdamlıların türkiyəli yarımmüdafiəçisi Orkun Kökçü Türkiyənin “Tivibu Spor” kanalına açıqlamalar verib. O, Türkiyədə oynamaq istədiyi klubun adını açıqlayıb:
“Cəmi 21 yaşım var. Hələ bütün karyeram irəlidədi. Əminəm ki, gələcəkdə indikindən də qat-qat yaxşı oynayacam. Düzdü, 19 yaşıma qədər Niderlandın aşağı yaş qruplarından ibarət komandalarında forma geymişəm. Amma iş əsas yığmaya çatanda üstünlüyü Türkiyəyə verdim. Bu qərarı ailə üzvlərimlə birlikdə qəbul etdim. Onlar mənim Türkiyə üçün oynamağımı istədilər. Transfer mövzusunda mənimlə bağlı bir çox şayiələrin yayıldığını bilirəm. Bu məsələlərin hamısını finaldan sonra müzakirə edəcəyik. Transfer məsələləri ilə atam və menecerim məşğul olur. Mən isə bütün diqqətimi finala yönəltmişəm. Joze Mourinyo çox böyük və təcrübəli məşqçidi. Bu cür kuboklardan karyerasında çox qazanıb. Ona görə də final asan keçməyəcək. Daha öncə “Beşiktaş” forması ilə məşq etdiyim videonu sosial şəbəkədə paylaşmışdım. Çünki mən “Beşiktaş”lıyam. Uşaqlıqdan bəri bu klubun azarkeşiyəm və bir gün təbii ki, orda oynamaq istəyərəm. “Beşiktaş”da oynamağın gözəl bir hiss olduğunu düşünürəm. Gələcəkdə nə olacağını bilməsəm də, inşallah, bir gün mən də bu hissi yaşayaram”.
Qeyd edək ki, Niderlandda doğulan və “Feyenoord”un yetirməsi olan Orkunun klubla 2025-ci ilə qədər müqaviləsi var. Kökçü bu mövsüm 49 rəsmi qarşılaşmada 9 qol, 9 məhsuldar ötürməlik performans sərgiləyib. Türkiyə yığmasında 14 oyuna çıxan və 1 qol vuran istedadlı futbolçunun transfer dəyəri təxminən 20 milyon avrodu.
