Bu mövsüm əla təsir bağışlayan, erediviziyada tarixinin 16-cı çempionluğuna doğru addımlayan, eləcə də Avropa Liqasında da yoluna davam edən ''Feyenoord''un ulduzu və kapitanı Orkun Kökçü son addımı ilə diqqət çəkib.

"Football-plus.az" xəbər verir ki, o, əslən Mərakeşdən olan komanda yoldaşları - Ussama İdrissi və Məhəməd Taabuni ilə birləşərək Rotterdamda iftar süfrəsi təşkil edib.

''Feyenoord''un ev oyunlarını keçirdiyi ''De Kuip'' stadionunda təşkil olunan iftar süfrəsinə 100-dən çox insan qatılıb. Türkiyə yığmasının da aparıcı futbolçularından sayılan Orkun açıqlamasında bunları deyib: ''Əslində ideya İdrissi ilə Taabunidən gəldi.

Onlar 2 həftə öncə bu fikri ortaya atdılar. Rəhbərlik də fikri dəstəklədi və iftar süfrəsi üçün yer ayırdılar. Hər şey istədiyimiz kimi oldu''. Orkun Kökçü dininə bağlı insan kimi tanınır. Hətta ötən ilin oktyabrında Niderlandda LQBT-yə dəstək kampaniyası çərçivəsində erediviziya klublarının kapitanlarına göy qurşağı rəngində sarğını taxmaq tapşırılmışdı. Həmin vaxt Kökçü sarğını taxmaqdan imtina etmişdi!

PSJ, ''Arsenal'', ''Mançester Yunayted'' başda olmaqla bir çox Avropa nəhənginin gündəmində olan 22 yaşlı yarımmüdafiəçi bu mövsüm 39 rəsmi oyunda 12 qol, 4 məhsuldar ötürmə ilə fərqlənib. Onun indiki transfer dəyəri təxminən 30 milyon avrodu.