''Qalatasaray''da icarə əsasında keçirdiyi mövsümdə xarüqələr yaradan və hazırda dünyanın ən çox müzakirə edilən forvardlarından biri olan Viktor Osimhenin gələcək taleyi ilə bağlı yeni xəbərlər var.

"Football-plus.az" xatırladır ki, daha öncə nigeriyalı hücumçunun ''Əl-Hilal''a keçməyə razılıq verdiyi və bu klubla anlaşdığı barədə xəbərlər gəlmişdi. Amma sən demə reallıq tamam fərqli imiş.

Osimhen birmənalı şəkildə Səudiyyə Ərəbistanında oynamaq istəmir. Onu heç kim ''Əl-Hilal''a keçməyə razı sala bilmir. Hətta ''Napoli'' rəhbərliyi də futbolçunun bu kluba keçməsi üçün ona təzyiq göstərir. Çünki ''Əl-Hilal'' neapolluların tələb etdiyi 75 milyon avroluq təzminatı ödəməyə hazırdı. Amma iddialara görə Osimhen ''Əl-Hilal''ın artıq 5-ci (!) təklifini də geri çevirib.

Ərəblər futbolçuya təklif olunan illik maaş baxımından 20 milyon avrodan 45 milyon avroya qədər yüksəlməyə də razılıq veriblər. Ancaq hətta bu məbləğ də onu razı salmaq üçün kifayət etməyib.

''Əl-Hilal'' üçün isə vaxt daralır. Klublararası DÇ-də iştirak edən klublara iyunun 1-də əlavə transfer ''pəncərəsi'' açılıb və bu müddət iyunun 10-da tamam olur. Son anda qeyri-adi bir şey baş verməsə, ''Əl-Hilal''ın KDÇ-də Osimhen ilə birlikdə iştirak etmək planı baş tutmayacaq. 26 yaşlı forvardın yaxın ətrafının iddiasına görə onun üçün Səudiyyə Ərəbistanı layihəsi cəlbedici deyil və Osimhen karyerasını yalnız Avropada davam etdirmək istəyir.

İtaliyalı jurnalist Alfredo Pedulla da Osimhenin ''Əl-Hilal''ın son təklifini qəbul etməməsi ilə tərəflər arasında danışıqlar prosesinin dayandırıldığını qeyd edib.