İyunun 26-da klublararası dünya çempionatında (KDÇ) qrup mərhələsinə yekun vuruldu.

Beləliklə, 1/8 finala vəsiqə qazanan komandaların siyahısı müəyyənləşdi. Bunlar “Palmeyras”, “Botafoqo”, “Flamenqo”, “Fluminense” (hamısı Braziliya), “Bavariya”, Dortmund “Borussiya”sı (hər ikisi Almaniya), “Çelsi”, “Mançester Siti” (hər ikisi İngiltərə), “İnter”, “Yuventus” (hər ikisi İtaliya), “İnter Mayami” (ABŞ), PSJ (Fransa), “Benfika” (Portuqaliya), “Monterrey” (Meksika), “Real” (İspaniya) və “Əl-Hilal”dı (Səudiyyə Ərəbistanı).

A qrupunda son tur ərəfəsində vəziyyət qarışıq idi. “Portu” ilə “Əl-Əhli” şəxsi dueldə qələbə qazanmaqla yanaşı, paralel keçirilən “İnter Mayami” – “Palmeyras” oyununun nəticəsini də gözləməliydi.

Meydan sahibləri “Palmeyras”la oyuna inamlı başlayaraq 16-cı dəqiqədə hesabı açdı. Alyendeyə məhsuldar ötürmə verən Suares 65-ci dəqiqə fərqi artıranda heç kimin oyunun taleyi ilə bağlı şübhəsi qalmadı. Amma uruqvaylı ulduz meydanı tərk edəndən sonra “İnter” ciddi çətinliklə üzləşdi.

Əlbəttə, bunda “Palmeyras”ın baş məşqçisinin əvəzetmələri də önəmli rol oynadı. Sonradan meydana çıxan Paulinyo və Maurisio oyunun axarını 180 dərəcədə dəyişdi. Bu futbolçuların vurduğu qollar amerikalıları 1-ci pillədən düşürdü. Bu isə o deməkdi ki, həm 38 yaşını tamamlayan Messinin əhval-ruhiyyəsi korlandı, həm də “İnter Mayami” 1/8 finalda PSJ-yə, yəni argentinalının heç də yaxşı ayrılmadığı komandaya rəqib oldu.

Yeri gəlmişkən, argentinalının şərəfini qoruduğu komandalar (istər yığma, istər klub səviyyəsində) 33-cü dəfə qrupdan növbəti mərhələyə çıxdı.

Qrupun digər oyununda da hadisələr maraqlı ssenari üzrə cərəyan etdi. Misirlilər dörd dəfə hesabda irəli çıxdı, portuqaliyalılar hər dəfə bərabərlik qolunu vurmağı bacardı. Xüsusən də Danimarkada dünyaya gələn, ötən ilə qədər bu ölkənin aşağı yaş qrupu yığmalarının şərəfini qoruyan, ardından Fələstin yığmasını seçən Əbu Əlinin het-trikinin işə yaramadığını qeyd etməliyik.

Yeri gəlmişkən, Əbu Əli Peleni xatırlamağa məcbur etdi. İş ondadı ki, indiyə qədər FİFA-nın bayrağı altında keçirilən turnirlərdə yalnız əfsanəvi braziliyalı Avropa klublarının qapısından üç top keçirməyi bacarmışdı. “Əl-Əhli” bu oyunda qapıya 23 zərbə vurdu, 12-si “çərçivə”yə getdi. “Portu”da isə bu göstərici 17-yə və 7-yə bərabər oldu. 4:4 hər iki komandanı “evə göndərdi”.

A qrupu, 3-cü tur
İnter Mayami – Palmeyras 2:2 (1:0)
İnter Mayami (ABŞ): Ustari, Allen, Falkon, Aviles, Veyqandt, Seqoviya (Alba, 66), Buskets, Redondo (Rodriges, 77), Alyende (Piko, 77), Suares (Kremaşi, 73), Messi.
Palmeyras (San Paulu, Braziliya): Veverton, Pikeres, Murilo (Fuks, 18), Qomes, Roşa (Roke, 67), Evanjelista (Allan, 67), Rios, Torres (Paulinyo, 55), Veyqa (Maurisio, 46), Estevan, Lopes.
Qollar: Alyende, 16 (1:0). Suares, 65 (2:0). Paulinyo, 80 (2:1). Maurisio, 87 (2:2).
Vərəqə: Messi, 45+1 – sarı.
Hakim: Şimon Marçinyak (Polşa).
23 iyun. Mayami. 60914 tamaşaçı.

Portu – Əl-Əhli 4:4 (1:2)
Portu (Portuqaliya): Ramuş, Markano, Ze Pedro, Euştakio, Moura, Qomes (Veyqa, 68), Varela (Omorodion, 46), J.Mario (Fernandeş, 62), Mora, Namaso (Borjeş, 46), Vieyra (Pepe, 68).
Əl-Əhli (Qahirə, Misir): Əl-Şenavi, Koka, Trezeqe (Kamal, 58), Ramadan, Dari, Hani, Ben-Romdan (Afşa, 87), Fəthi (Dyenq, 35), Sayed, Əbu Əli (Benşarki, 58), Əl-Şahat (Qradişar, 58).
Qollar: Əbu Əli, 15 (0:1). Mora, 23 (1:1). Əbu Əli, 45+2-p. (1:2). Qomes, 50 (2:2). Əbu Əli, 51 (2:3). Omorodion, 53 (3:3). Ben-Romdan, 64 (3:4). Pepe, 89 (4:4).
Vərəqələr: Hani, 25. Ramadan, 54. Benşarki, 60. Dari, 68 – sarı.
Hakim: Xesus Valensuela (Venesuela).
23 iyun. Nyu Cersi. 39893 tamaşaçı.

1. Palmeyras 3 1 2 0 4-2 5
2. İnter Mayami 3 1 2 0 4-3 5
3. Portu 3 0 2 1 5-6 2
4. Əl-Əhli 3 0 2 1 4-6 2