Klublararası Dünya Çempionatının (KDÇ) məkanı müəyyənləşib. 2025-ci ilə təyin olunan növbəti turnir Amerika Birləşmiş Ştatlarında keçiriləcək.

Bu barədə FİFA-nın saytı məlumat yayıb. Turnir 2025-ci il iyunun 15-də başlayacaq və iyulun 13-də sona çatacaq. Növbəti KDÇ-nin yeni formatda keçiriləcəyini də qeyd edək. Yarışda 7 yox, 32 komanda iştirak edəcək. Yeri gəlmişkən, 2023-cü ildə turnirin qalibi finalda “Fluminense”ni (Braziliya) 4:0 hesabı ilə məğlub edən “Mançester Siti” olub.
Artıq FİFA gələnilki turnirdə iştirak edəcək komandaların ilkin siyahısını açıqlayıb. Hazırkı məqamda 19 iştirakçı məlumdu. Siyahıya “Çelsi” (İngiltərə, UEFA Çempionlar Liqasının 2020/21 mövsümünün qalibi), “Real” (İspaniya, UEFA ÇL-in 2021/22 mövsümünün qalibi), “Mançester Siti” (İngiltərə, UEFA ÇL-in 2022/23 mövsümünün qalibi), “Bavariya” (Almaniya, UEFA-dakı reytinqinə əsasən), PSJ (Fransa, UEFA-dakı reytinqinə əsasən), “İnter” (İtaliya, UEFA-dakı reytinqinə əsasən), “Portu” (Portuqaliya, UEFA-dakı reytinqinə əsasən), “Benfika” (Portuqaliya, UEFA-dakı əsasən), “Palmeyras” (Braziliya, Libertadores Kubokunun 2021-ci ildəki qalibi), “Flamenqo” (Braziliya, LK-nın 2022-ci ildəki qalibi), “Fluminense” (Braziliya, LK-nın 2023-cü ildəki qalibi), “Əl-Əhli” (Misir, Afrika ÇL-in 2020/21 və 2022/23 mövsümünün qalibi), “Vidad” (Mərakeş, Afrika ÇL-in 2021/22 mövsümünün qalibi), “Əl-Hilal” (Səudiyyə Ərəbistanı, Asiya ÇL-in 2020/21 mövsümünün qalibi), “Urava Red Daymonds” (Yaponiya, Asiya ÇL-in 2021/22 mövsümünün qalibi), “Monterrey” (Meksika, KONKAKAF Kubokunun 2021-ci ildəki qalibi), “Sietl Saunders” (ABŞ, KONKAKAF Kubokunun 2022-ci ildəki qalibi), “Leon” (Meksika, KONKAKAF Kubokunun 2023-cü ildəki qalibi), “Oklend Siti” (Yeni Zelandiya, OFK-dakı reytinqinə əsasən).

Son 13 iştirakçı daha sonra müəyyənləşəcək.