“Turan Tovuz”un ev oyunlarını keçirdiyi arenanın ot örtüyü ötən yay yenilənsə də, Tovuza səfər edən komandalar meydanın ağırlığından şikayətlənir, futbolçular üçün belə qazonda oynamağı çətin olduğunu qabardırlar.

“Neftçi”nin baş məşqçisi Laurensiu Regekampf da ölkə kubokunun aprelin 19-da keçirilən yarımfinal mərhələsinin ilk qarşılaşmasından sonra məğlubiyyətə əsas səbəblərindən biri kimi süni örtüyü göstərmişdi.

Rumın mütəxəssisdən öncə “Sabah”ın çalışdırıcısı Murad Musayev, “Qarabağ”ın baş məşqçisi Qurban Qurbanov da Tovuz səfərindən sonra eyni fikirləri səsləndirməklə yadda qalmışdılar. Süni örtük məsələsi tovuzluların özlərini də narahat edir. Ayxan Abbasovun komandası çempionat oyunlarını süni örtükdə keçirməklə yanaşı, məşqlərini də burda edir ki, bu da futbolçuların tez-tez zədələnməsinə səbəb olur.

Durumdan narahat olan klub rəsmilərini, daha dəqiq desək, “Turan Tovuz”un sponsoru “Huner Group”up rəhbəri Ehtiram Quliyev problemin həllinə çalışır.

“Football-plus.az” saytına daxil olan məlumata görə klubun sponsoru mövsümlərarası fasilədə süni qazonu təbii ot örütüyü ilə əvəzlənməsini planlaşdırır. Bununla yanaşı klub rəhbərliyi “Huner Group”un dəstəyi ilə rayon ərazisində boş torpaq sahəsi axtarışındadı. Məqsəd komandanın məşq etməsi üçün yeni təbii örtüklü meydanın salınmasıdı.

RƏŞAD