İki mövsümdü sabit oyunla yadda qalan “Zirə” ulduzlarını itirməyə çox yaxındı. Belə ki, mövsümün gedişində Rafael Utziqin komandadan gedəcəyi bəlli idi. Salifi Suma isə Kiyev “Dinamo”suna keçidin astanasındadı.

Ölkənin ən yaxşı büdcəyə malik klublarından biri niyə liderlərini saxlaya bilmir? Ötən mövsüm pley-offa qədər irəliləyən paytaxt təmsilçisi bu il ilk mərhələdəcə mübarizəni dayandıra oxşayır.

Əslində Suma və Utziqin yaxşı komandalara getməsi “Zirə” və Azərbaycan futbolunun CV-si üçün müsbət addımdı. Amma komanda hücum xəttinin dominantlarını satmaqla gələn mövsüm çempionatda da çətinliklə üzləşəcək. Düzdü, Rəşad Sadıqov bir sistem qurub, amma aparıcı futbolçular qalsa, yaxşıdı. Konate ilə Boqomolskinin onları əvəz edəcəyi inandırıcı görünmür. “Hayduk”la oyunlara qədər bu futbolçuların qalması “Zirə”yə ümid verə bilər. Sumasız, Utziqsiz “Zirə” üçün pley-offda yox, ilk oyunda darmadağın qaçılmazdı.

MÜZƏFFƏR QULUZADƏ