“Zirə”nin sağ cinah vingeri Salifi Suma çoxdan başqa klubların gözündə “yağlı tikə”di.

Onunla qitənin bir çox klubu maraqlanır. Gənc qvineyalının adı indi də Moskva “Spartak”ı ilə yanaşı çəkilir. Düzdü, Moskva klubunun rəsmiləri və futbolçunun meneceri Yusef Mussaid bu məlumatı təkzib edib. Buna baxmayaraq, menecer Rusiyanın bir neçə klubu ilə danışıq apardığını deyib. Bəs Salifi Sumada nə görüblər ki, transferi bu qədər gündəmdədi?

Yaş amili. Qvineyalı futbolçunun 21 yaşı var. Yaşı az, perspektivi böyükdü. Avropada belələri gündüz çıraqla axtarılır.

Futbolçu həm surəti, həm də texnikası ilə fərq yarada bilir. Məhsuldarlığı da öz yerində. Əsas vəzifəsi qol vurmaq olmayan futbolçu cari mövsümdə meydana çıxdığı 30 oyunda 11 qol vurub, 4 məhsuldar ötürmə verib.

Avropa klubları belə futbolçuya”yatırım” kimi baxırlar. Məlum məsələdi ki, futbolçunu alacaq hansısa klub “Zirə”yə milyonlar ödəməyəcək. 850 min avro dəyəri olan Sumaya ödəniləcək maksimal məbləğ bunun üçqatı qatı ola bilər. Onu da xatırladaq ki, “Zirə”yə 2023-ün avqustunda qoşulan qvineyalının klubla müqaviləsinin müddəti 2027-nin iyununa qədərdi.

MÜZƏFFƏR QULUZADƏ