Yay “transfer pəncərəsi” açılmasa da, bəzi klublar transfer etməyə başlayıb.

İlk gözlənilməz transfer “Zirə”dən gəldi. Rəşad Sadıqovun komandası “Neftçi”də neçə mövsümdü ehtiyat qüvvə kimi görünən, komandaya hansısa ciddi fayda verməyən Yeqor Boqomolskini heyətinə qatdı.

Məlum məsələdi ki, “Zirə”də transferlər Sadıqovun istəyi ilə həyata keçirilir. Bəs baş məşqçi belaruslu hücumçuda nə gördü ki, transfer etdi?

Futbolçunun 25 yaşı var. Aydın məsələdi ki, “Neftçi” Yeqoru gətirəndə ona böyük ümidlər bəsləyirdi. Amma belaruslu futbolçu üç mövsüm ərzində ümidləri doğrulda bilmədi. Yeqor sürətli olmasa da, müəyyən texniki bacarıqları var. Ucaboy (186 sm) hücumçu başla oyun baxımından da fərqlənmir. Çox güman, Rəşad Sadıqov onu Rafael Utziqin əvəzedicisi kimi görür. Amma qarpızın ağ da çıxa bilər – “Qarabağ”dan icarəyə götürülmüş Rüstəm Əhmədzadə kimi. Yenə də uğurlar. Təki qazanan Azərbaycan futbolu olsun.

Xatırladaq ki, Boqomolski son mövsümdə ölkə kuboku qarışıq 14 oyuna çıxıb, dörd qolla yadda qalıb.

MÜZƏFFƏR QULUZADƏ