2024/25 mövsümünü “Şamaxı”nın heyətində keçirən, “futbol ili” bitəndən sonra “Zirə” ilə anlaşan Brahim Konate “Football-plus.az”a müsahibə verib.

- Artıq “Zirə”nin futbolçususan. “Şamaxı”nı tərk etməyinin səbəbi nə idi? Maliyyə şərtlərində razılaşmadız, yoxsa...
- Səmimi olsaq, “Şamaxı”nın yeni müqaviləsini qəbul etmədim. Çünki ailəmlə birlikdə yaşamaq imkanım yox idi. Onlardan 10 ay ayrı qaldım və bu, asan deyildi. “Zirə”nin təklifindən isə çox razı qaldım.

- Yeni komandan haqqında fikirlərin necədi? Uyğunlaşa bilmisən?
- “Zirə” yaxşı oyunçulara malik olan güclü komandadı. Başa çatan mövsümdə bu kollektivə qarşı dörd dəfə oynamışam. Bütün matçlar çətin keçib. Yavaş-yavaş komandaya uyğunlaşıram. Ümumi enerji çox yaxşıdı.

- Bəs başqa hansı klublardan təklif almışdın?
– Hindistandan da təklif gəlmişdi. Başqa klublardan da maraq var idi. Arzum Azərbaycanda qalmaq idi. Hər halda, “Zirə”ni seçdim. Çünki klubun layihəsi məni inandırdı və məşqçinin danışdıqları xoşuma gəldi. Karyeramın davamı üçün bu qərarın düzgün olduğuna inanıram.

- Azərbaycan premyer-liqasında rəqabətin səviyyəsindən razısan? Ümumiyyətlə, burda özünü necə hiss edirsən?
– Liqada səviyyə yaxşıdı. Düşünürəm ki, növbəti mövsüm səviyyə daha da yüksələcək. Şəxsən özümü burda yaxşı hiss edirəm.

- Məlumdu ki, “Zirə” Konfrans Liqasının 2-ci təsnifat mərhələsində “Hayduk”la qarşılaşacaq. Bu komanda haqda nə düşünürsən?
- “Hayduk”a ad olaraq bələdəm. Oyun gününə kimi mümkün qədər yaxşı hazırlaşacağıq. Komandama inanıram.

- Rəşad Sadıqov avrokubok matçlarında sənə şans verəcək?
- Bunun üçün əlimdən gələni edəcəyəm. Rəqabəti sevən biriyəm.

Xatırladaq ki, 29 yaşlı futbolçu “şirlər”in heyətində keçirdiyi 30 oyunda 9 qol, 3 məhsuldar ötürmə ilə yadda qalıb. Fransalı yarımmüdafiəçi “qartallar”la ikiillik müqaviləyə imza atıb.

KƏNAN BAHADIR