''Çelsi''nin baş məşqçisi oyun vaxtı yaranan fasilələr üzündən KDÇ-ni yıxıb-sürüdü
Klublararası Dünya Çempionatı ilə bağlı həm futbolçular, həm də məşqçilərin iradları davam edir.
Onsuz da təqvim baxımından əlverişli vaxta təsadüf etməyən və bu üzdən tez-tez tənqid atəşinə tutulan turnir oyunların gedişində yaranan fasilələr üzündən də futbol ictimaiyyəti tərəfindən birmənalı qarşılanmadı.
Ən son 1/8 finalda ''Benfika'' - ''Çelsi'' oyunu 86-cı dəqiqədə əlverişsiz hava şəraiti üzündən dayandırıldı və oyunda 1 saat 53 dəqiqəlik fasilə yarandı. Bu artıq turnirin gedişində ildırım çaxması üzündən məcburi fasilə yaranan 7-ci qarşılaşma oldu. 2 saata yaxın fasilə bitdikdən sonra ''Benfika'' özündə güc taparaq penaltidən bərabərlik qolunu vurdu. Amma ''Çelsi'' əlavə vaxtda 3 top vuraraq 4:1 üstün oldu. Londonluların baş məşqçisi Entso Mareska matçın ardından qəzəbli acıqlamalar verərək bunları dedi:
''85 dəqiqə ərzində oyuna nəzarət tamamilə bizim əlimizdə idi. Ancaq uzunmüddətli fasilədən sonra oyun tamamilə dəyişdi. Mənim fikrimi bilmək istəyirsizsə, bu, futbol deyil. Belə futbol olmur! Bu turnirdə artıq 7 və ya 8-ci oyun məcburi olaraq dayandırılır. Bu, tam bir komediyadı. Təhlükəsizlik üzündən bu addımın atıldığını anlayıram. Ancaq bir turnirdə hava şərtləri üzündən 7-8 oyun təxirə salınırsa, deməli turnirin keçirildiyi məkan yenidən gözdən keçirilməlidi! Bura böyük ehtimalla belə turnirlər üçün uyğun bir yer deyil. Bir oyunun gedişində əlavə fasilə yaranırsa, bu artıq futbol deyil. Bu, tamam fərqli bir şeydi. 1,5-2 saatlıq bir fasilə yarandı. Fasilədən sonra artıq tamamilə fərqli futbol izlədik. Tempimiz pozuldu. Eyni futbolu sərgiləyə bilmədik. İnsanlar isə tribunada deyib-gülür, əylənir, yemək yeyir və telefonla danışırdılar. Məhz bu üzdən fasilədən sonrakı oyunu futbol adlandırmaq istəmirəm''.
Digər xəbərlər
