Çempionlar Liqasında dünən ilk 1/4 finalçılar bəlli oldu.

''Football-plus.az'' xəbər verir ki, ''Barselona'' ''Benfika'' ilə ev oyununda favorit statusunu doğrultmağı bacardı. Ötən həftə Lissabonda minimal hesabla üstün olan Kataloniya nəhəngi doğma meydanda 3:1 hesablı asan qələbə qazandı. 4 qolun hamısı ilk yarıya təsadüf etdi. Rafinyanın ilk qoluna ''Benfika''nın müdafiəçisi Otamendi cavab verdi. Amma bundan artığına qonaqların gücü çatmadı. Çox keçmədən Yamal ''Barsa''nı yenidən hesabda önə keçirdi. Yekun nəticəni isə dubl edən Rafinya müəyyənləşdirdi. Braziliyalı vinger qollarının sayını 11-ə çatdıraraq bombardirlər yarışında lider oldu. Maraqlıdı ki, ''sambaçı'' bu 11 qoldan 5-ni ''Benfika''ya vurub. O, həm ötən həftə, həm də əsas mərhələdə bu rəqiblə görüşdə fərqlənmişdi. Yamal isə ÇL tarixində bir oyunda həm qol vuran, həm də məhsuldar ötürmə verən ən gənc (17 yaş 214 gün) futbolçu oldu.

7-ci dəqiqədə fransalı hakim Fransua Letesyenin oruc tutan futbolçular üçün kiçik fasilə yaratması diqqət çəkdi. Amma ''Benfika''nın türkiyəli futbolçusu Orkun Kökçü hakimə iftar açmaq üçün hələ tez olduğunu dedi. Belədə referi 15-ci dəqiqədə yenidən oyunda kiçik fasilə yaratdı. Həmin an Orkun Kökçü, Kərəm Aktürkoğlu və Yamal oruclarını açdılar.

ƏLİ