Səudiyyə Ərəbistanında türkiyəli isimlərin sayı artır. Merih Dəmiral ''Əl-Əhli''də forma geyirsə, Fatih Terim ''Əl-Şabab''ı çalışdırır. Bu ölkənin ortabab klublarından olan ''Əl-Oxdud'' da heyətini türkiyəli futbolçu ilə gücləndirib.

Söhbət ''Kasımpaşa''nın üzvü Gökhan Güldən gedir. 26 yaşlı futbolçu bu klubla ikiillik müqavilə imzalayıb. Türkiyə mətbuatının yazdığına inansaq, Gökhan Gül yeni klubunda illik 5 milyon avro qazanacaq. Amma ''Kasımpaşa''ya nə qədər təzminat ödəniləcəyi barədə məlumat yoxdu. Tibbi müayinənin ardından rəsmi açıqlamanın ən qısa müddətdə veriləcəyi gözlənilir.

Qeyd edək ki, Almaniyada doğulan və ''Bohum'', ''Fortuna'', ''Vehen'' kimi klubların şərəfini qoruyan Gökhan Gül Türkiyəyə 2021-ci ildə gəlib. Əsasən dayaq yarımmüdafiəçisi kimi oynayan, amma mərkəz müdafiəçisi kimi də oynamağı bacaran futbolçu 2023-ün yanvarından bu yana ''Kasımpaşa''nın uğurları üçün tər tökürdü. İstanbul təmsilçisi ilə 66 rəsmi oyuna çıxan Gökhan aktivinə 4 qol, 3 məhsuldar ötürmə yazıb.