Daha bir türkiyəli futbolçu Avropaya transfer olunmaq üzrədi. Belə ki, İngiltərə premyer-liqasının iddialı klublarından olan ''Aston Villa'' ''Kasımpaşa''nın gənc mərkəz müdafiəçisi Yasin Özcana rəsmi təklif irəli sürüb.

''Football-plus.az'' xəbər verir ki, 18 yaşlı futbolçu gələn həftə İngiltərəyə gedərək tibbi müayinədən keçdikdən sonra rəsmi müqaviləyə imza atacaq. Türkiyə mətbuatının yazdığına görə Birmingem klubu bu transferə görə 8 milyon avro ödəyəcək.

İddialara görə Yasin mövsümün ikinci dövrəsini icarə əsasında elə ''Kasımpaşa''da keçirəcək və ''Aston Villa''nın düşərgəsinə yayda yollanacaq. Amma bu fakt hələ dəqiqləşməyib. ''Aston Villa'' buna razılıq verməyəcəyi təqdirdə Yasin birdəfəlik İngiltərə klubunda oynamağa başlayacaq. ''Kasımpaşa''nın öz yetirməsi olan və 2022-də klubla peşəkar müqavilə imzalayan Özcan bu mövsüm superliqada 17 oyunda iştirak edib və aktivinə 1 məhsuldar ötürmə yazıb.

Qeyd edək ki, ötən mövsüm də qış transfer dönəmində buna bənzər keçid baş tutmuşdu. ''Brentford'' 4,5 milyon avro qarşılığında ''Sivasspor''un gənc dayaq yarımmüdafiəçisi Yunus Əmrə Konakı heyətinə qatmışdı. Amma 18 yaşlı futbolçunun İngiltərə karyerasının uğurlu keçdiyini söyləmək çətindi.

Yunus ilyarım ərzində premyer-liqa klubunda cəmi 7 rəsmi oyuna çıxıb.

ƏLİ