Merih Dəmiral Terimin Səudiyyə Ərəbistanına gəlməsi haqda nə dedi?
Karyerasını Səudiyyə Ərəbistanında davam etdirən Merih Dəmiral Fatih Terim və onun bu ölkəyə gəlişi haqda açıqlamalar verib.
''Football-plus.az'' xəbər verir ki, Dəmiral 2023-ün avqustundan etibarən ''Əl-Əhli''nin şərəfini qoruyur. Terim isə bilindiyi kimi artıq ''Əl-Şabab''ın baş məşqçisi kimi çalışır. Yeri gəlmişkən, bu komandalar bu günlərdə üz-üzə gələcək. Yanvarın 10-da ''Əl-Əhli'' ''Əl-Şabab''ı qəbul edəcək. Bu, Terimin Səudiyyə Ərəbistanı çempionatında debüt oyunu olacaq. Merihi dinləyək:
''Fatih Terim ilə 2-3 gün öncə telefonda söhbətləşdik. Mükəmməl bir insandı. Baş məşqçi kimi Türkiyə və İtaliyada böyük işlər görüb. Türkiyə tarixinin ən güclü məşqçilərindən biridi. Çoxları ona öz idealı gözü ilə baxır. ''Əl-Şabab''ın başına keçdiyini eşidəndə çox sevindim. Həm klub, həm də Səudiyyə Ərəbistanı futbolu üçün çox şey edəcəyini düşünürəm. Bu yaxınlarda onunla görüşəcəyik. Terimlə bağlı ilk xatirələrim AÇ-2008 ilə əlaqəlidi. Orda bizimkilər inanılmaz işlər görmüşdü. 9-10 yaşlarım var idi. Yadımdadı ki, Türkiyənin hər oyunundan öncə üzümü ağ-qırmızı rənglərə boyayırdım. Hər birimiz çox çılğın anlar yaşadıq. Buna görə də Terimi sevirəm və ona xüsusi hörmətim var''.
ƏLİ
