''Trabzonspor'' prezidenti: ''Uğurcanı ''Fənər''ə 20 milyona da satmaram''
''Trabzonspor'' və Türkiyə yığmasının qapıçısı Uğurcan Çakırın ''Fənərbaxça''ya transferi, eləcə də Dominik Livakoviçin ''Fənər''dən ayrılması mövzusunda yeni xəbərlər var.
Nəhayət, ''Trabzonspor'' cəbhəsindən Uğurcanla bağlı yayılan iddialara rəsmi münasibət bildirilib. Özü də bunu klub prezidenti Ərtuğrul Doğan özü edib. Fanatlar Uğurcanın özündən açıqlama gözləyirdilər. Axı ''Trabzonspor''la ''Fənərbaxça''nın münasibətləri qaydasında deyil. Ona görə də belə səssiz-sedasız şəkildə ''Trabzonspor''un kapitanı və öz yetirməsini ''Fənər''ə buraxması birmənalı qarşılanmırdı. Doğan gözlənildiyi kimi sərt açıqlamalar verərək Uğurcanı hətta 20 milyon avroya da ''Fənər''ə satmayacağını bildirib:
''Uğurcan məsələsi qəribə hal alıb. Mən daha öncə çox açıq və konkret olaraq bu mövzuda fikrimi bildirmişdim. Uğurcan bizim kapitanımız, ən dəyərli oyunçularımızdan biri, qardaşımız, trabzonlu və əsil ''Trabzonspor''ludu. Kapitanımızı satmaq niyyətimiz yoxdu! Yalnız xaricdən təklif gəlsə və bu təklif bizi qane etsə, o zaman düşünmək olar. Daha öncə ona xarici klubdan rəsmi bir təklif gəlmişdi. Özünə təklif edilən şərtlər qənaətbəxş olsa da, kluba təklif edilən şərtlər istənilən səviyyədə olmadığı üçün qəbul etməmişdi. O vaxt ona özüm də söz vermişdim ki, xarici klubdan yaxşı bir təklif gəlsə, mane olmayacam. Uğurcanın özünün də Avropa ilə bağlı hədəfləri, arzuları var. Bundan açıq şəkildə bir şeyi necə izah edim? ''Fənərbaxça''dan nəinki 15, heç 20 milyon avroluq təklif də gəlsə, yenə də satmaram! Hətta özü ora getmək istəsə də, satmaram. Biz heç kimlə polemika yaşamaq istəmirik. ''Fənərbaxça'', ''Qalatasaray'' və ''Beşiktaş'' da daxil olmaqla bütün klublara hörmətimiz var. Amma bizə indiyə qədər heç kimdən təklif gəlməyib. Yəni ortada ümumiyyətlə heç nə yoxdu. Amma sosial şəbəkələrdə bu tip xəbərlər yenə də dolaşır. Belə davam etsə, biz də başqa cür hərəkət edəcəyik. Bizim kapitanımızı heç kim ağzında saqqız etməsin. Artıq yetər. Hər halda ümid edirəm ki, sözlərimdən lazımi nəticələr çıxarılacaq''.
Digər tərəfdən Livakoviçin Türkiyədən ayrılması məsələsi də asan görünmür. Çünki ona hələ heç bir təklif yoxdu. Xorvatiya yığmasının qapıçısının menecerinin onun üçün klub axtarışı davam edir.
''Fənər'' bu qapıçıya görə 7 milyon avro tələb edir. ''Fənər''in əfsanəvi qapıçısı Volkan Dəmirəl bu günlərdə ''Uğurcanın transferi baş tutsa, bu, Türkiyədə ilin transferi olacaq'' açıqlamasını vermişdi.
Digər xəbərlər
