''Fənərbaxça'' dünya səviyyəli bir ulduz transfer etmək arzusunu həyata keçirmək üçün dəridən-qabıqdan çıxır.

Bir müddət öncə İstanbul nəhənginin ''Mançester Siti''dən ayrılan və sərbəst futbolçu statusunda olan Kevin De Bruyneyə iki il üçün 25 milyon avro maaş təklif etdiyi məlum olmuşdu. Amma belçikalı ulduz həmin an artıq ''Napoli'' ilə anlaşmışdı.

''Fənər'' indi də diqqətini Randal Kolo Muaniyə yönəldib. Yussef Ən-Nəsirinin mövsüm ərzində 30 qol vurmasına baxmayaraq onunla yolları ayırmağı planlaşdıran rəhbərlik mərakeşlinin yerinə fransalı ulduzu transfer etmək istəyir.

Muani son mövsümün ikinci dövrəsini icarə əsasında ''Yuventus''da keçirsə də, müqavilə ilə PSJ-yə məxsusdu. Qışda Milan Şkrinyarın PSJ-dən ''Fənər''ə gəlişi zamanı bu iki klubun rəhbərliyi arasında yaxşı münasibətlər yaranmışdı. Rəhbərlik səviyyəsində Əli Koç özü şəxsən qarşı tərəflə danışıqlarda iştirak edir. Muaninin meneceri ilə danışıqları isə ''sarı-lacivərdlilər''in yeni idman direktoru Devin Özək aparır.

İddialara görə ''Fənər'' transfer dəyəri 30 milyon avro civarında olan Muaniyə görə parislilərə 25 milyon avro təklif edib! 26 yaşlı fransalı forvardın keçidi bu qiymətə baş tutsa, o, Türkiyə çempionatı tarixinin ən bahalı transferinə çevriləcək. ''Yuve'' ilə icarə müqaviləsi başa çatan Kolo Muani yığma pəncərəsinin ardından yenidən PSJ-yə qayıdacaq.

Turin nəhəngində meydana çıxdığı 19 rəsmi oyunda 8 qol, 2 məhsuldar ötürmə ilə fərqlənən futbolçunun PSJ ilə 2028-ə qədər müqaviləsi var.