''Fənərbaxça''nın braziliyalı ulduzundan transfer etirafı
Hazırda vətəni Braziliyada tətildə olan ''Fənərbaxça''nın ulduz futbolçusu Fred ''Atletiko Mineyro''dan aldığı təklifi geri çevirdiyini açıqlayıb.
Qeyd edək ki, 32 yaşlı futbolçu məhz ''Atletiko Mineyro''nun yetirməsidi. Amma bu klubda peşəkar səviyyədə debüt etmədən o, 17 yaşında ''İnternasyonal''a yollanmışdı. Fred Braziliya mətbuatına açıqlamasında bunları deyib:
''Atletiko Mineyro'' rəsmiləri ilə söhbət etdim. Braziliyaya dönüş üçün qapıları birdəfəlik bağlamamışam. Konkret olaraq klubun baş direktoru Viktor mənimlə əlaqə saxladı. Ona ''Fənərbaxça'' ilə müqaviləmin davam etdiyini və indi geri dönmək üçün ideal zaman olmadığını dedim. Ancaq Braziliyaya geri dönmək istədiyim vaxt mənə qapılarının açıq olduğunu dedi. ''Atletiko Mineyro''ya böyük sevgim var. Bir gün ''Arena do Qalo''da meydana çıxmağı arzu edirəm. Təəssüf ki, ''Atletiko''dan çox erkən ayrılmalı oldum. Halbuki mən əslən Belu Orizontedənəm. Elə ailəm də ordandı. Ayrılmağa həvəsli deyildim. Amma ''İnternasyonal'' o vaxt çox yaxşı şərtlər təklif etmişdi. Qalmaq istədiyim üçün ilk növbədə ''Atletiko'' rəhbərliyi ilə görüşdüm. Ancaq ortaq məxrəcə gələ bilmədik. Çünki bəzi şeylərdən vaz keçmək istəmədilər''.
Qeyd edək ki, Fred 2023-cü ildən ''Fənər''in şərəfini qoruyur. Geridə qoyduğumuz mövsümdə o, 45 rəsmi oyunda aktivinə 5 qol, 8 məhsuldar ötürmə yazıb. Tanınmış futbolçu hələ də Türkiyə karyerasında titula həsrətdi.
Digər xəbərlər
