Rusiya – Ukrayna müharibəsinin ilk günlərində “Krasnodar”dan 8 legionerin ayrıldığını xəbər vermişdik.

Onlardan ikisi artıq özünə yeni iş yeri tapıb.
Braziliyalı Vanderson vətəninə qayıdıb. 27 yaşlı hücumçu yaya qədər icarə əsasında “İnternasyonal”da oynayacaq. Braziliya klubunun onu birdəfəlik transfer etmək hüququ var. Vanderson “Krasnodar”da 2017-ci ildən çıxış edir. Bu klubda 130 oyun keçirən futbolçu 17 qolun və 21 məhsuldar ötürmənin müəllifi olub.

“Krasnodar”dan ayrılan daha bir cənubi amerikalı da karyerasını Braziliyada davam etdirəcək. Xunior Alonso bu ölkənin son çempionu “Atletiko Mineyro”ya qayıdıb. Xatırladaq ki, 29 yaşlı paraqvaylı müdafiəçi Rusiya klubuna yanvarda transfer olunmuşdu. Agenti Dieqo Serrati müştərisinin icarə əsasında bu ilin sonuna qədər Braziliyada oynayacağını bildirib. O, Alonsonun “Krasnodar”a qayıtmaq niyyətində olmadığını da əlavə edib.

Yeri gəlmişkən, Qjeqoj Krıxovyak da Rusiya klubundan ayrılıb. FİFA-nın məlum qərarına uyğun olaraq müqaviləsini birtərəfli qaydada dayandıran polşalı yarımmüdafiəçi mövsümün sonuna qədər icarə əsasında AEK-də (Yunanıstan) çıxış edəcək.