Oktyabrın 22-23-də Libertadores Kubokunun (LK) pley-offunda sonuncudan əvvəlki mərhələyə start verildi. Cənubi Amerikanın ən nüfuzlu klub turnirində yarımfinalın ilk oyunları keçirildi.

Bu mərhələdə Braziliyanın 2, Argentina və Uruqvayın hərəyə 1 klubu çıxış edir. İlk oyunlar diqqəti braziliyalıların inamlı qələbələri ilə cəlb etdi. Regionun ən böyük ölkəsinin təmsilçiləri rəqiblərini evdə böyük hesabla məğlubiyyətə uğratdılar. “Atletiko Mineyro” – “River Pleyt” matçı daha böyük maraq doğursa da, meydanda ciddi rəqabət yaşanmadı. Argentinalı Qabriel Militonun çalışdırdığı meydan sahibləri buenos ayresliləri 3 cavabsız qolla məğlub etdilər. Deyverson “Atletiko Mineyro”nun inamlı qələbəsində iki qol və bir məhsuldar ötürmə ilə böyük rol oynadı.

“Botafoqo” rəqibinə daha böyük hesabla qalib gəldi. Hazırda Braziliya çempionatında liderlik edən rio de janeyrolular “Penyarol”un qapısından 5 cavabsız top keçirdilər. Beləliklə, LK-nın yarımfinalının ilk oyunlarından sonra finalın Braziliya klublarının iştirakı ilə keçmək ehtimalı artdı.

yarımfinal, ilk oyunlar
Atletiko Mineyro (Braziliya) - River Pleyt (Argentina) 3:0
Deyverson, 22; 70. Paulinyo, 74.

Botafoqo (Rio de Janeyro, Braziliya) - Penyarol (Uruqvay) 5:0
Savarino, 51; 59. Barboza, 55. Luis Enrike, 73. İqor Jezus, 79.

Cavab oyunları oktyabrın 29-30-da keçiriləcək.

Bombardirlər: Junior Santos (Botafoqo RJ) - 9, Paulinyo (Atletiko Mineyro) – 7, Silvera (Penyarol), Borxa (River Pleyt) – 6.

STATİSTİKLƏR ÜÇÜN
İtaliya çempionatının 8-ci turunun “Verona”- “Montsa” oyununu (0:3) 24854 tamaşaçı izləyib.