Məlum olduğu kimi təxminən bir ay öncə ''Əl-Nəssr''dən ayrılacağına işarə vuran Kriştiano Ronaldo bu klubda qalası oldu.

Portuqaliyalı superulduz Səudiyyə Ərəbistanı nəhəngi ilə ikiillik yeni müqavilə imzalayıb.

Bu arada İngiltərənin ''San'' nəşri Ronaldonun yeni müqaviləsinin detallarını açıqlayıb. Bu detallarla tanış olduqdan sonra şoka düşməmək mümkün deyil. Çünki belə şərtlər nəinki futbol, bəlkə də heç idman tarixində görünməyib! Göstəricilər funt sterlinqlə verilib, amma biz sizin rahatlığınız üçün rəqəmləri avroya çevirmişik. Beləliklə, möhkəm dayanın.

* İllik maaş: 209 milyon avro
* İmza parası: 28,75 milyon avro (ikinci mövsüm komandada qalsa, məbləğ 44,6 milyon avroya yüksələcək)
* Hər bir qol üçün bonus: 93,9 min avro (növbəti mövsüm məbləğ 20 faiz artacaq)
* Hər bir məhsuldar ötürmə üçün bonus: 47 min avro (növbəti mövsüm məbləğ 20 faiz artacaq)
* Ölkə çempionluğu bonusu: 9,4 milyon avro
* Ölkə çempionatında bombardirlik bonusu: 4,7 milyon avro
* Asiya Çempionlar Liqasına vəsiqə və çempionluq bonusu 7,63 milyon avro

Bütün bunlardan başqa ''Qızıl top''un beşqat qalibi ''Əl-Nəssr''in səhmlərinin 15 faizinə sahib çıxıb ki, bu da 38,7 milyon avroya bərabərdi! Ronaldonun 16 işçisi - 3 sürücüsü, 4 ev qulluqçusu, 2 aşpazı, 3 bağbanı və 4 mühafizəçisi olacaq. Ronaldonun il ərzində təyyarə ilə uçuşu kluba əlavə 4,69 milyon avroya başa gələcək. Və nəhayət, klub Kriştianoya Səudiyyə Ərəbistanı və Asiya şirkətləri ilə sponsorluq müqavilələrindən 70,4 milyon avroluq əlavə qazanc söz verib.

Qısası, ''San'' nəşrinin hesablamalarına görə Ronaldo qarşıdakı iki ili ''Əl-Nəssr''də keçirəcəyi təqdirdə bu müddət ərzində təxminən 575 milyon avro qazanacaq!