“Uimbldon”un builki mükafat fondu turnirin tarixində rekord məbləğ təşkil edəcək.

"Football-plus.az" xəbər verir ki, bu barədə yarışın rəsmi saytı məlumat verib. Konkretləşdirsək, söhbət 44,7 milyon funt sterlinqdən (təxminən 52,2 milyon avro) gedir. Sözügedən məbləğ ötənilkindən 11,2, dörd il öncə keçirilən turnirlə müqayisədə isə 17,1 faiz çoxdu.

Kişilər və qadınların fərdi mübarizəsində qalibin hər biri 2,35 milyon funt sterlinq (2,75 milyon avro), mükafatçılar isə 1,175 milyon (1,37 milyon) qazanacaq. Saytda bu mükafatların 2019-cu ildəki ilə eyni olduğu vurğulanıb.

Əvəzində yarışın ilkin raundlarında idmançılara dəstəyə daha böyük önəm verilib. Seçmə turnirlərin mükafat fondu ötən illə müqayisədə 14,5 faiz artırılıb. Əsas mərhələnin birinci dövrəsində mübarizəni dayandıran tennisçilər isə 55 min funt sterlinq (64 min avro) qazanacaqlar ki, bu da 2022-ci illə müqayisədə 10 faiz çoxdu.

Kişilər və qadınların cütlük yarışlarının mükafat fondu ötənilkindən 10,7 faiz çox olacaq. Eyni zamanda, əlil arabasında mübarizə aparan idmançıların fərdi və cütlük turnirlərinin mükafat fondu təxminən 20 faiz artırılıb.

Xatırladaq ki, “Uimbldon” iyulun 3-16-sı aralığında Londonun tennis kortlarında təşkil olunacaq.