“Real”, nəhayət, Xabi Alonsonun rəhbərliyi altında ilk qələbəsini qazandı. Amma komanda yenə xeyli güc sərf etməli oldu. Raul Asensio sanki bu turnirə “Real”a qənim kəsilməyə gəlib.

"Football-plus.az" xəbər verir ki, ilk turda penaltiyə səbəbkar olan gənc müdafiəçi bu dəfə artıq 7-ci dəqiqədə “son ümid folu”na görə meydandan qovuldu! Yəni “kral klubu”, demək olar, bütün oyunu azlıqda keçirmək məcburiyyətində qaldı. Ancaq bunun “Paçuka”ya bir faydası dəymədi.

Səviyyəcə rəqibdən üstün olan Madrid nəhəngi hələ fasiləyə qədər 2 topluq üstünlük yaxaladı. Əvvəlcə Bellingem işlək olmayan sol, çox keçmədən Arda Gülər işlək olmayan sağ ayağı ilə fərqləndi. Meksika təmsilçisi bu nəticə ilə razılaşmaq istəmirdi.

“Paçuka”nın qapıya 25 zərbə endirməsi də bunu göstərir. 2014-cü ildən bəri əlavə vaxta gedən oyunları saymasaq, heç bir klub “Real”la görüşdə qapıya bu qədər zərbə endirməmişdi. Amma bu zərbələrdən yalnız biri qolla nəticələndi. Bu qola qədər isə intriqa artıq ölmüşdü. Çünki ilk turda penaltini boşa verən Valverde bu dəfə 2-ci hissədə fərqi darmadağın həddinə çatdırdı.

Qrupun digər oyununda “Əl-Hilal” favorit statusunu doğrulda bilmədi və “Zaltsburq”la qolsuz bərabərliyə razı oldu. Halbuki Səudiyyə Ərəbistanı nəhəngi ilk turda “Real” ilə qarşılaşmada çox yaxşı təsir bağışladığı üçün bu dəfə komandadan çox şey gözləmək olardı. Beləliklə, bu qrupda son turda əsas mübarizə üç komanda arasında gedəcək.

“Paçuka” artıq pley-off şansını itirib. “Real”la “Zaltsburq”un duelində qalib gələn tərəf qrupu lider kimi tamamlayacaq. Maraqlıdı ki, burda da E qrupundakı kimi vəziyyət yaranıb. “Real” ilə “Zaltsburq” arasında 0:0 və 1:1-dən başqa qeydə alınacaq istənilən hesablı bərabərlik nəticəsində “Əl-Hilal”ın “kitabı bağlanacaq”.

H qrupu, 2-ci tur
Real – Paçuka 3:1 (2:0)
Real (Madrid, İspaniya): Kurtua, Aleksander-Arnold (Rüdiger, 78), Asensio Höysen, F.Qarsiya, Çuameni, Arda Gülər (Modriç, 60), Cud Bellingem (Sebalyos, 60), Valverde, Vinisius (Munyos, 87), Q.Qarsiya (Dias, 46).
Paçuka (Meksika): Moreno, L.Rodriges (Lopes, 60), Bauermann, Pereyra, Qonsales, E.Montyel, Palavesino (Viktor Alfonso Qusman, 72), Dominges (Kabral, 46), Bautista (Kennedi, 46), Kenedi (Sançes, 60), Rondon.
Qollar: C.Bellingem, 35 (1:0). A.Gülər, 43 (2:0). Valverde, 70 (3:0). E.Montyel, 80 (3:1).
Vərəqələe: Palavesino, 18 – sarı. Asensio, 7 – qırmızı.
Hakim: Ramon Abatti (Braziliya).
22 iyun. Şarlott. 70248 tamaşaçı.

Zaltsburq – Əl-Hilal 0:0
Zaltsburq (Avstriya): Zavişitski, Layner, Qadu, Rasmussen, Kratsiq, Bidstrup, Diabate (Mellberq, 46), Dorgeles (Kyarqor, 77), Qlux (Kitano, 65), Baydu (Vertessen, 77), Onisivo (Dagim, 65).
Əl-Hilal (Ər-Riyad, Səudiyyə Ərəbistanı): Bunu, Kanselo (Əl-Yami, 80), Kulibali, Əl-Tombakti (Layami, 88), Lodi (Əl-Harbi, 89), Neveş, N.Əl-Davsari (Əl-Cuvayr, 86), Malkom (Kanno, 68), Milinkoviç-Saviç, S.Əl-Davsari, Leonardo.
Vərəqələr: Diabate, 36. Kitano, 85 – sarı.
Hakim: Vilton Sampayo (Braziliya).
22 iyun. Vaşinqton. 16167 tamaşaçı.

1. Real 2 1 1 0 4-2 4
2. Zaltsburq 2 1 1 0 2-1 4
3. Əl-Hilal 2 0 2 0 1-1 2
4. Paçuka 2 0 0 2 2-5 0

Bombardirlər: Di Mariya (Benfika), K.Yıldız (Yuventus), Musiala, Olise (hər ikisi “Bavariya”) – 3.