Heyətini gücləndirməyə çalışan “Hayduk”un transfer bazarında maneələrlə rastlaşmasından xəbərdarsız.

“Zirə”nin Konfrans Liqasının 2-ci təsnifat mərhələsindəki rəqibi indiyə qədər qapıçı və hücumçunun keçidi zamanı problemlə üzləşib. Maraqlıdı ki, Split təmsilçisinin müdafiəçi axtarışı da fayda vermir.

“Football-plus.az”ın məlumatına görə, “dəniz ustaları” bu dəfə Kreşimir Krizmaniçlə müqavilə bağlamaqda israrlı olsa da, istəyinə çata bilmir.

“Qoriça”nın formasını geyən futbolçu iyunun 30-da azad agent statusu alacaq. Əlbəttə, “Hayduk” fürsətdən yararlanmaq istəyir, lakin bunun üçün İran çempionu “Traktor”dan daha sərfəli təkliflə çıxış etməlidi. Çünki Krizmaniçlə danışıqlara başlayan Təbriz təmsilçisi oyunçunun “saqqızını oğurlamağa” yaxındı.

Xorvatiya mətbuatı iddia edir ki, “Traktor” rəhbərliyi baş məşqçi Draqan Skoçiçin 2024/25 “futbol ili”ndə heyətə cəlb etdiyi xorvat futbolçulardan məmnundu və daha çox oyunçunun alınması üçün mütəxəssisin sərəncamına yetərincə ciddi məbləğ verilib.

Maraq üçün bildirək ki, Krizmaniçin danışıq apardığı klublar siyahısında “Riyeka” da var. Ancaq futbolçu “Traktor”la anlaşmaq niyyətindədi. Müdafiəçini narahat edən yeganə məqam isə İsraillə İran arasında baş verən hadisələrdi. O, yekun qərarını açıqlamaq üçün məhz bu məsələnin nə ilə nəticələnəcəyini görmək istəyir.

Bildirək ki, Krizmaniç başa çatan mövsümdə meydana çıxdığı 32 matçda 2 qol vurub.

KƏNAN BAHADIR