İranın futbol çempionatının lideri “Traktor”un çıxışına son vaxtlar daha çox yer ayırmağımız təsadüfi deyil. Axı Təbriz klubu 55 illik tarixində ilk dəfə çempion olmağa çox yaxındı. Güney Azərbaycan türklərinin qüruru bu gün “Malavan”la 27-ci turun oyununa çıxacaq. Bəs “Traktor”u çempionluğa bu qədər yaxınlaşdıran şəxs kimdi? Bəribaşdan deyək ki, artıq bir göstəricidə tarixə düşmüş şəxs!

1968-ci il sentyabrın 3-də Rieka şəhərində dünyaya gələn Draqan Skoçiç peşəkar səviyyədə ölkə xaricində legioner həyatına başlayan ilk xorvatiyalı futbolçudu! O, 1991-93 aralığında İspaniya klublarından “Las Palmas”ın, 93-96 aralığında isə “Kompostela”nın şərəfini qoruyub.

2005-ci ildə başladığı məşqçi karyerasında bir çox titul qazansa da, indiyə qədər çempion ola bilməyib. 2020-22-ci illər aralığında İran yığmasını, 2023-dən 2024-ə qədər Xorvatiyanın U-21 yığmasını çalışdırıb. Ötən ilin iyulunda “Traktor”un “sükanı arxasına” keçib.

Beləliklə, “Traktor”la Skoçiçin bir ortaq cəhəti var: titullar var, amma çempionluq yoxdu. Görünür, məhz bu il ikisinin də arzuolunmaz seriyası qırılacaq.

MÜZƏFFƏR QULUZADƏ