Hələ ki, transferdə real addımlar atmayan ''Beşiktaş''ın gündəminə tez-tez yeni oyunçular gəlir.

"Football-plus.az" xəbər verir ki, Vedat Muriqinin ardından bu dəfə İstanbul nəhəngi ''Əl-Əhli''nin tanınmış forvardı Roberto Firminoya maraq göstərməyə başlayıb.

Hazırda futbolçu ilə danışıqlar davam edir. Onu Türkiyəyə gəlməyə razı salmaq mümkün olsa, klub rəsmiləri ''Əl-Əhli'' ilə də danışıqlara başlayacaq.

''Qartal'' braziliyalı hücumçunu icarə yox, daimi əsasda heyətinə qatmaq istəyir. Firminonun ''Əl-Əhli'' ilə birillik müqaviləsi var. Onun məvacibinin yüksək olduğunu nəzərə alsaq, Səudiyyə Ərəbistanı klubu ''sambaçı''nı buraxmağın əleyhinə deyil. Amma ''Beşiktaş''ı daha çox Firminonun fiziki durumu maraqlandırır. Çünki bu il onun 34 yaşı tamam olacaq. Bu futbolçu futbol dünyasında daha çox ''Liverpul''dakı çıxışı ilə məşhurdu.

O, ''qırmızılar''ın heyətində 8 il ərzində 362 oyunda 111 qol, 76 məhsuldar ötürmə ilə fərqlənib və önəmli titullar qazanıb. Firmino Salah və Mane ilə birlikdə uzun illər ''Liverpul''un əzəmətli hücum üçlüsünü təşkil edib.

2023-cü ildən şərəfini qoruduğu ''Əl-Əhli''də isə o indiyə qədər 65 oyunda aktivinə 21 qol, 17 məhsuldar ötürmə yazıb. Karyerasının zirvə nöqtəsində dəyəri 90 milyon avro olan Firminonun hazırda dəyəri 5 milyon avrodu.