Viktor Osimhenin ''Qalatasaray''a hay-küylü transferinin ardından İstanbulun daha bir nəhəngi transfer bombasını partlatmaq xəyalına düşüb.

Belə ki, ''Beşiktaş'' Sadio Maneyə ciddi maraq göstərməyə başlayıb. Seneqallı ulduz Səudiyyə Ərəbistanında xoşbəxt deyil və Avropaya qayıtmaq barədə düşünür. ''Əl-Nəsr'' isə onun performansından narazıdı. Mane böyük ümidlərlə gəlsə də, artıq gözdən düşüb. Amma onun Avropaya qayıtmaq arzusunun önündə böyük bir əngəl var.

Belə ki, Avropanın böyük əksəriyyətində artıq transfer pəncərəsi bağlanıb. Türkiyədə isə ''pəncərə'' sentyabrın 13-ü saat 23.59-da bağlanacaq. Bu da ''Beşiktaş''ın şanslarını artırır. Fanatlar həyəcanla bu mövzuda xəbərləri izləyirlər. Danışıqlar prosesi davam edir. ''Beşiktaş''ın ''Əl-Nəsr''ə təklif etdiyi məbləğ barədə məlumat yoxdu. Çox güman, bu transfer yalnız icarə əsasında baş tuta bilər.

Şayiələrə inansaq, Mane özü də Türkiyədə oynamağın əleyhinə deyil. ''Liverpul''da əsil dünya ulduzuna çevrilən Manenin karyerası İngiltərədən ayrıldıqdan sonra istənilən məcrada davam etmir. ''Bavariya''da bir mövsüm ərzində ümidləri doğrultmayan Mane Səudiyyə Ərəbistanında da fanatların ondan gözlədiklərini verə bilmədi. O, ''Əl-Nəsr''də indiyə qədər 52 rəsmi oyunda 19 qol, 15 məhsuldar ötürmə ilə fərqlənib.

ƏLİ