"Azərbaycan bazarının beş ulduzu” sərlövhəli yazıda Rüfət Abbasova da yer vermişdik.

Əlbəttə, “Şamaxı”nın futbolçusunun ilk “beşlik”də yer alması əbəs deyil. Ona görə ki, 20 yaşlı müdafiəçi 2024/25 mövsümündə “şirlər”in bütün premyer-liqa matçlarında şans qazandı və baş məşqçi Ayxan Abbasovun ümidlərini doğrultdu. Özü də 1 qol, 5 məhsuldar ötürmə ilə komandası üçün faydalı oldu. Rüfət həm də U-21 millimizin aparıcı üzvlərindən biridi - yığmanın bu ay keçirdiyi yoxlama oyunlarında Belarusa qarşı 78 (1:3), Monteneqroya (0:0) qarşı 83 dəqiqə forma geyib.

Hər halda, “Transfermarkt”da dəyəri 700 min avro dəyərində olan oyunçu parlaq gələcək vəd edir və təəssüf ki, futbol təsərrüfatımızda belə gənclər barmaqla sayılacaq qədərdi... Odu ki, Rüfətlə əlaqə saxlayıb hədəfləri, indiyəqədərki karyerası və bundan sonrakı planları haqda danışmağı lazım bildik.

- “Şamaxı”yla birgə çox çətin mövsümü geridə qoydun. Komanda rəqabətin pik həddə çatmasına baxmayaraq, premyer-liqada yerini qorudu. Bəs son mövsümü özün üçün uğurlu sayırsanmı?
- Həqiqətən gərgin və bir-birindən maraqlı oyunlar keçirdik. Rəqabət yüksək səviyyədə oldu. Şükür, əsas məqsədimizə çatdıq. Bu baxımdan, yaxşı iş gördüyümüzü düşünürəm. Ancaq özümü dəyərləndirmək doğru olmaz.

– “Şamaxı” ilə müqavilənin müddəti davam edir. Böyük ehtimalla, növbəti mövsümü də bu komandada keçirəcəksən. Lakin başqa klublardan təklif aldığın haqda bilgilər var. Ən maraqlısı isə legioner həyatı yaşayıb-yaşamayacağındı. Ümumiyyətlə, özünü buna hazır hiss edirsən?
– Başqa yerlərdən gələn təkliflər kluba yönəldilir. Düşünürəm ki, hələ gəncəm. Üzərimdə işləməli, daha da inkişaf etməliyəm. Gələcəkdə nəyin baş verəcəyini zaman göstərəcək.

– Hansısa sürpriz olmasa, “Şamaxı” yenə premyer-liqada qalmaq uğrunda mübarizə aparacaq. Avrokuboklarda çıxış etmək niyyətin var?
– Bəli, reallıq onu göstərir ki, hədəf yenə eyni olacaq. Ancaq məqsədimiz sırf premyer-liqada qalmaq yox, bacardığımız qədər yüksək pillələrdə qərarlaşmaqdı. Əlbəttə, hər futbolçu kimi mən də avrokuboklarda oynamaq istəyərəm. Ancaq gələcəkdə.

– Növbəti “futbol ili”ndən gözləntilərin nədi? Məlum, daha üç bölgə təmsilçisi – “Qəbələ”, “Karvan” və “İmişli” də premyer-liqada olacaq. “Şamaxı”nın növbəti dəfə sınaqdan üzüağ çıxacağına inanırsan?
– Əlbəttə. Hətta deyərdim ki, daha yaxşısını edəcəyimizi düşünürəm. İnşallah, daha yaxşı nəticələr qazanacağıq. Rəqabətə hazır olmalıyıq. Bizi qarşıda təlim-məşq toplanışı gözləyir. Bu fürsətdən maksimum yararlanmalıyıq.

– U-21-də durum necədi? Sonuncu toplanışda qələbə qazana bilmədiz. Buna nə səbəb oldu?
– Ayxan Abbasovun rəhbərliyi altında ikinci dəfə toplanış keçdik. Uğursuz olduğumuzu düşünmürəm. Belarusla matçda üstün tərəf olsaq da, 5 dəqiqədə 2 qol buraxdıq. Monteneqroyla matçda isə qol vəziyyətlərini dəyərləndirə bilmədik. Əsas məqsəd AÇ-2027-nin seçmə mərhələsinə hazırlaşmaq idi. Bu baxımdan matçlar bizim üçün faydalı oldu.

– Həm millidə, həm də klubda Ayxan Abbasovla çalışırsan. Bu məqam sənin üçün nə dərəcədə faydalıdı?
– Ayxan müəllimlə işləmək çox xoşdu. “Şamaxı”ya gəlməyimin əsas səbəblərindən biri məhz odu. Münasibətlərimiz qaydasındadı. Səhvlərimi, çatışmazlıqlarımı mənimlə bölüşür və üzərimə işləmək üçün şərait yaradır. Bu üzdən hər zaman ən yaxşısını etməyə çalışıram. İnanıram ki, gələcəkdə bunun faydasını görəcəm.

KƏNAN BAHADIR