Ayxan Abbasov "Şamaxı"nı ona əmanət edib... - özü Türkiyədən göstəriş verir
U-21-in Antalyada keçirdiyi təlim-məşq toplanışı davam edir.
Bilindiyi kimi, martın 26-dək qardaş ölkədə olacaq gəncləri baş məşqçi Ayxan Abbasovla birgə köməkçiləri Elnur Çodarov və Kamil Qafarov çalışdırır.
Bununla belə, "Şamaxı" da məşqləri bərpa edib. Komanda Misli premyer-liqasının 28-ci turu çərçivəsində "Zirə"nin qonağı olacağı matça hazırlaşır.
Maraqlıdı, bəs Ayxan Abbasov və köməkçiləri ölkəmizdə deyilsə, “şirlər”in məşqlərinə kim nəzarət edir?
"Football-plus.az" bu sualla klubun idman direktoru Kamran İsmayılovla müraciət edib:
"Komanda məşqləri Ayxan Abbasovun köməkçilərindən olan Xəyal Qarayevin rəhbərliyi altında keçir. Düzdü, baş məşqçimiz Türkiyədədi. Ancaq proses məhz onun planları əsasında irəliləyir. Ayxan bəy komandayla tez-tez əlaqə saxlayır və lazımi göstərişlərini verir. Məşqdən videolar çəkilir və baş məşqçimizə göndərilir. Yəni hər şey onun nəzarəti altındadı. Bütün legionerlər düşərgədədi. Yerli futbolçulardan yalnız U-21-ə dəvət edilənlər bizimlə deyil".
Xatırladaq ki, "Zirə" - "Şamaxı" matçı martın 30-da, saat 18.00-da başlayacaq.
KƏNAN BAHADIR
Digər xəbərlər
