Misli premyer-liqasının 36-cı turunun “Qarabağ”la oyunundan sonra “Şamaxı”nın baş məşqçisi Ayxan Abbasov yalnız dörd legionerin – Rikardo Fernandes, Andrey Tırkovyanu, Vladislav Veremeyev və Alfons Msanqanın komandada qalacağını açıqladı.

Deməli, “şirlər”dən ayrılacaq legionerlər də bəllidi. Gəlin əvvəlcə baş məşqçinin qalacağını dediyi legionerlərin “Şamaxı” üçün nə dərəcədə faydalı olduğuna baxaq.

Rikardo Fernandes. Nəinki “Şamaxı”nın, çempionatın ən yaxşı qapıçılarından biridi. Düzdü, adətən, aşağı pillələrdə qərarlaşan komandaların qapıçıları göz önündə olurlar. Lakin Rikardonun səviyyəsi açıq-aşkar gözə dəyir. 30 yaşlı portuqaliyalı 35 oyunda qapını qoruyub, 45 qol buraxıb, 8 “quru” oyun keçirib. Rikardonun “transfermarkt” dəyəri 200 min avrodu.

Andrey Tırkovyanu. Rumıniyalı hücumameyilli yarımmüdafiəçi qışda komandaya qoşulub. 18 mümkün oyunun 16-da meydanda olub, bir qolu, iki məhsuldar ötürməsi var. Tırkovyanunun “transfermarkt” dəyəri 150 min avro təşkil edir.

Vladislav Veremeyev. Ukraynalı da qışda gəlib. 26 yaşlı mərkəz müdafiəçisi 15 oyun keçirib. Bu 15 oyunda dörd dəfə sarı vərəqə alan Veremeyevin də “transfermarkt” dəyəri 150 mindi.

Alfons Msanqa. Qışda gələn futbolçulardan biri də Msanqadı. 21 yaşlı tanzaniyalı dayaq yarımmüdafiəçisi 17 oyuna çıxıb, üç qol, bir məhsuldar ötürmə ilə yadda qalıb. Onun “transfermarkt” dəyəri 50 min avrodu.

MÜZƏFFƏR QULUZADƏ