Çempionlar Liqasının startı ''Yuventus'' üçün uğurlu alındı.

Birillik fasilədən sonra Avropanın ən mötəbər klub turnirinə qayıdan Turin nəhəngi yenilənmiş qrup mərhələsinin ilk oyununda öz meydanında PSV üzərində 3:1 hesablı inamlı qələbə qazandı. ''Yuve''nin gənc vingeri Kənan Yıldız özünü yaxşı tərəfdən göstərdi. Bu turnirdə debüt oyununa çıxmasına baxmayaraq Türkiyə yığmasının üzvü 21-ci dəqiqədə mükəmməl qol vurmaqla qələbənin əsasını qoydu.

Maraqlıdı ki, Kənan 19 yaş 136 günlüyündə fərqlənməklə ''Yuventus''un heyətində ÇL-də qol vuran ən gənc futbolçuya çevrildi! Özü də o, kumiri Alessandro Del Pyeroya məxsus rekordu (20 yaş 308 gün) yenilədi. Del Pyero həmin qolu 1995-in sentyabrın 13-də Dortmund ''Borussiya''sı ilə oyunda vurmuşdu.

Bu mövsüm ÇL-in qrupunda vurulan ilk qolun müəllifi olan Kənan həm də matçın ən yaxşı oyunçusu seçildi.

ƏLİ