Sane İstanbula gəldi və ilk açıqlamalarını verdi
Leroy Sanenin ''Qalatasaray''la anlaşdığını xəbər vermişdik.
Bu transfer rəsmən təsdiqini tapıb. İstanbul nəhəngi danışıqlara başlandığını öz saytında rəsmən açıqlayıb. Almaniyalı ulduz dünən gecə, yerli vaxtla saat 02.30-da İstanbula gəlib.
Qeyd edək ki, ''Qalatasaray''ın ''yutub'' səhifəsində Saneni gətirən özəl təyyarənin uçuşunu canlı şəkildə təqib etmək mümkün oldu. Həmin yayını izləyənlərin sayı 2,4 milyona çatmışdı. Sanenin İstanbula ayaq basdığı ilk anlarda isə izləyici sayı 3,1 milyonu ötmüşdü! İtaliyalı menecer Corc Qardi ilə birlikdə İstanbula gələn 29 yaşlı vinger böyük izdihamla qarşılanmasa da, hava limanına kifayət qədər azarkeş gəlmişdi.
''Əl-Hilal'' və ''Fənərbaxça''dan da rəsmi təkliflər alan tanınmış futbolçu Çempionlar Liqası amilinə görə ''Qalatasaray''a üstünlük verib. Ona yeni klubunda Dris Mertensin ayrılmasından sonra boş qalan ''10'' nömrəli formanın veriləcəyi gözlənilir. Sane hava limanında ilk açıqlamalarını verərək bunları deyib:
''Bura gəldiyim üçün çox sevincliyəm. Fanatların səsini eşidirəm. Bu da məni əlavə sevindirir. Burdakı stadionda daha öncə oynamışam. Orda inanılmaz bir atmosfer və ab-hava olur. Bizi fitə basırdılar. Amma bundan sonra artıq mənim arxamda olacaqlar. Onlar üçün oynamaq indidən məni çox həyəcanlandırır. Hava limanına məni qarşılamağa gələn hər kəsə minnətdaram. Bu gecə vaxtı onların bura gəlməsi mənim üçün çox böyük məna kəsb edir. Dediyim kimi fanatların coşqusu, stadionda yaratdıqları atmosfer qərarımda mühüm rol oynadı. Klubun böyüklüyü, mənə çox ciddi maraq göstərmələri kimi amilləri də qeyd edə bilərəm. Fanatların önündə keçirəcəyim ilk oyunu indidən səbirsizliklə gözləyirəm. Dursun Özbək, Okan Buruk və Abdulla Kavukçu başda olmaqla bura gəlişimdə rolu olan hər kəsə təşəkkür edirəm''.
Digər xəbərlər
