''Bavariya''nın illik ''10+5'' milyon avroluq maaş təklifini, eləcə də əlavə imza parasını qəbul etməyərək sərbəst oyunçuya çevrilən Leroy Sane ilə bağlı önəmli transfer xəbəri var.

"Football-plus.az" xəbər verir ki, Almaniya yığmasının üzvünün Münhen nəhəngində qalmayacağı demək olar, mayın sonlarından bəlli idi. Onun yenidən İngiltərəyə qayıdacağı güman edilirdi.

Təcrübəli futbolçunun xidmətində ''Arsenal'' maraqlı idi. Ancaq Sanenin digər təkliflərə də açıq olduğu məlum olduqdan sonra ''Qalatasaray''la ''Fənərbaxça'' arasında sanki bir hərrac başladı. Hər iki klub bir-biri ilə bəhsə girərək təklifi artırmağa başladı. İyunun 6-da ''Fənər''in illik 14 milyon, ''Qalatasaray''ın 10-11 milyon avro təklif etdiyi bildirilirdi. Amma Avropanın bir çox aparıcı mənbələrinin ən son məlumatına inansaq, 29 yaşlı vinger üstünlüyü ''Cim-Bom''a verib! Bunu həm ''Bild'', həm ''Skay Sport'', həm də ''Foot Mercato'' təsdiqləyir.

Türkiyə mətbuatı 11 milyon avroluq maaşdan dəm vursa da, bu, inandırıcı görsənmir. Adətən xəbərləri doğru çıxan İngiltərənin ''Atletik'' portalı isə tərəflərin illik 15 milyon avrodan olmaqla üçillik anlaşma əldə etdiklərini iddia edib. Sanenin ən qısa müddətdə imza üçün İstanbula gələcəyi və son detalların burda razılaşdırılacağı gözlənilir.

''Şalke-04''ün yetirməsi olan və peşəkar karyerasına bu klubda start verən Sane 2016-20-ci illərdə ''Mançester Siti''də Xosep Qvardiolanın başçılığı altında oynayıb. 5 il öncə 49 milyon avroya transfer olunduğu Münhen nəhəngində 220 rəsmi oyunda 61 qol, 55 məhsuldar ötürməlik performans sərgiləyib. Almaniya yığmasında isə indiyə qədər 70 oyuna 14 qol vurub.