''Mançester Siti'' ilə müqavilə müddəti başa çatan və İngiltərədən ayrılaraq sərbəst futbolçuya çevrilən Kevin De Bruyne ilə bağlı çox maraqlı bir xəbər ortaya atılıb.

Belçikalı ulduzun böyük ehtimalla ''Napoli''yə transferi ən qısa müddətdə rəsmiləşəcək. Futbolçunun təmsilçiləri mayın 27-dən Neapoldadılar. Amma sən demə De Bruyne ''Napoli''dən başqa Türkiyədən də çox ciddi təklif alıbmış. Bu xəbəri belçikalı İdman jurnalisti və insayder Saşa Tavolieri yayıb.

Onun paylaşdığı məlumata görə ''Fənərbaxça'' De Bruyneyə illik 12,5 milyon avro maaş olmaqla ikiillik müqavilə təklif edib! Yəni 33 yaşlı futbolçu Türkiyədə iki ilə 25 milyon avro qazana bilərdi. Təcrübəli futbolçu ''Fənər''dən təklif alarkən artıq ''Napoli''yə müsbət cavab vermişdi və qərarını dəyişmək istəmədi. Amma De Bruyne neapollularla olan müqaviləyə çox mühüm bir maddə saldırıb. Belə ki, baş məşqçi Antonio Konte klubu tərk edəcəyi təqdirdə onun müqaviləni birtərəfli şəkildə ləğv etmək hüququ olacaq. Düzdü, ''Napoli'' rəhbərliyi ulduz futbolçuya Kontenin ayrilmayacağı ilə bağlı zəmanət verib.

Amma İtaliya mətbuatının yazdığına inansaq, məşqçi ilə rəhbərliyin bəzi məsələlərdə fikirləri üst-üstə düşmür. Ona görə də Konte çempion etdiyi klubu hər an tərk edə bilər. Bu halda ''Fənərbaxça''nın da onunla bağlı ümidləri yenidən canlana bilər. Hələlik isə hər kəs rəsmi açıqlamanı gözləyir. Də Bruyne Neapolda artıq özünə ev də tapıb. O, üçillik müqaviləyə imza atacaq və illik 10 milyon avro qazanacaq. Yəni əslində ''Fənərbaxça''nın təklifi daha sərfəli imiş.

Qeyd edək ki, ''Siti''nin tarixinə adını qızıl hərflərlə yazdıran De Bruyne son mövsümdə zədələr üzündən özünü yaxşı tərəfdən göstərə bilmədi və 39 rəsmi oyunda aktivinə yalnız 6 qol, 8 məhsuldar ötürmə yaza bildi.