Kərəm Aktürkoğlunun ayrılmasından sonra ''Qalatasaray''ın önəmli silahlarından və liderlərindən birinə çevrilən Yunus Akgünün adı ətrafında şayiələr dolaşmaqda davam edir.

''Football-plus.az'' xəbər verir ki, karyerasının ən yaxşı mövsümünü keçirən 25 yaşlı vinger hələ də İstanbul nəhəngi ilə yeni müqavilə imzalayıb. Baxmayaraq ki, rəhbərlik onunla az qala mövsümün əvvəlindən danışıqlar aparır.

Tərəflər bir ara ümumiyyətlə, anlaşmaqdan çox uzaq idilər. Son xəbərlərdə isə artıq anlaşmanın əldə olunduğu qeyd edilirdi. Sadəcə Yunusun menecerinin tələb etdiyi komissiya haqqı ''Qalatasaray'' rəhbərliyini qane etmir. Onlar məbləğin aşağı endirilməsini istəyirlər. İndi də anlaşmanın rəsmiləşməsinə mane olan məqam məhz budu.

Yunusun ''sarı-qırmızılar''la müqavilə müddəti 2026-ya qədərdi. Bu futbolçunun müqaviləsində 11 milyon avroluq sərbəst qalma maddəsinin olması Avropa klublarının ona marağını artırır. Bu arada uzun müddətdi Yunusu diqqət mərkəzində saxlayan ''Benfika''nın artıq bu futbolçunu transfer etmək üçün ciddi addımlar atmağa başladığı iddia edilib.

Türkiyə mətbuatının yazdığına inansaq, Lissabon nəhəngi 11 milyon avroluq təzminat maddəsini ödəməyə razıdı. Xatırladaq ki, Türkiyə yığmasının iki üzvü '-Kərəm Aktürkoğlu ilə Orkun Kökçü məhz ''Benfika''da çıxış edir. ''Cim-Bom'' təbii ki, əsas oyunçularından birini bu məbləğə satmaq istəmir.

Rəhbərliyin fikrincə, Yunusun dəyəri ən azı 20-25 milyon avrodu. Maraqlıdı ki, Türkiyə yığmasının üzvünün illik maaşı hələ də 300 min avrodu. ''Qalatasaray'' ona 2 milyon avro maaş olmaqla 4 illik müqavilə təklif edib. Rəhbərlik eyni zamanda sərbəst qalma maddəsinin götürülməsini, ya da 25 milyon avroya yüksəldilməsini istəyir.

Görünən odu ki, Yunus bu yay adı transferdə ən çox hallanan türkiyəli futbolçulardan biri olacaq. Akgün bu mövsüm iştirak etdiyi 38 rəsmi oyunda 12 qol, 8 məhsuldar ötürməlik diqqətçəkən performans sərgiləyib.