Fransada baş verən kütləvi iğtişaşlar PSJ-nin tarixində ilk dəfə Çempionlar Liqasını qazanmasının səbəb olduğu bayram ab-havasını korladı.

"Football-plus.az" xəbər verir ki, mayın 31-dən iyunun 1-nə keçən gecə ölkəboyu iğtişaşlar, polislə toqquşmalar və yanğınlar müşahidə olundu. RMC radiostansiyasının məlumatına görə, bu hadisələr zamanı iki adam ölüb, ən azı 214-ü yaralanıb, 550-dən artıq adam saxlanılıb.

"İnter"lə oyunun final fiti səslənən kimi minlərlə azarkeş Parisin və başqa şəhərlərin küçələrinə axışdı. Əsas izdiham Yelisey sarayı ətrafında və “Park de Prens” stadionunun yaxınlığında müşahidə olundu. Əvvəlcə hər şey nisbətən sakit idi, lakin sonra təxribatlar başladı, hüquq-mühafizə orqanlarının əməkdaşlarına atəşfəşanlıq elementləri atıldı, eləcə də kütləvi davalar və talanlar başladı.

Yerli polisin məlumatına görə, 17 yaşlı yeniyetmə küçə toqquşması zamanı ölüb. İkinci ölüm hadisəsi paytaxtın 15-ci dairəsində qeydə alınıb: skuterdə olan qadın idarəetməni itirərək PSJ azarkeşlərinin olduğu avtomobilə çırpılıb. Müxtəlif mənbələrə görə, 200-dən çox adam yaralanıb, lakin onların sayı hər saat artır.

İğtişaşların qarşısını almaq üçün Paris küçələrinə 5500-ə yaxın polis və jandarm çıxarıldı. Gözyaşardıcı qaz, su şırnaqları və rezin dəyənəklərdən istifadə olundu. Bütün bunlara baxmayaraq, hakimiyyət orqanları belə hadisəyə hazır deyildi. Fransanın daxili işlər naziri Bruno Retayo talançıların hərəkətlərini kəskin şəkildə pisləyib və onları “idmanı gözdən salan barbarlar” adlandırıb. Nazir həmçinin günahkarların mütləq cəzalandırılacağına da söz verib.

İğtişaşlar təkcə Parisdə yox, Lion, Marsel, Nant, Strasburq və Qrenoblda da qeydə alındı. Bəzi rayonlarda dükanların vitrinləri sındırıldı, avtomobilləri aşırdılar, zibil qablarını yandırdılar. Onlarla yanğınsöndürmə briqadası yanğını söndürdü. İnsidentə baxmayaraq, Paris şəhərinin hakimiyyət orqanları komandanın iyunun 2-nə planlaşdırılan paradını ləğv etmədi. Parad gücləndirilmiş təhlükəsizlik tədbirləri ilə Yelisey meydanında keçirildi. Komandanı Fransa prezidenti Emmanuel Makron da qəbul etdi.

Yeri gəlmişkən, UEFA ÇL-in finalından sonra təhlükəsizlik kordonunu yarıb meydana çıxan fransalı azarkeşlərə görə də PSJ-ni cəzalandıra bilər. Həmçinin Fransa klubunun azarkeşləri oyunun gedişində kütləvi şəkildə pirotexniki vasitələrdən yararlanıb, üzərində “Stop genocide in Gaza” (Qəzzada soyqırımı dayandırın) yazısı olan pankart açıblar.

“Ekip”in məlumatına görə, qitə futbol qurumu parisli azarkeşlərin hərəkətini reqlamentin pozulması kimi qiymətləndirib və araşdırmaya başlayıb.