“Napoli”nin İtaliya çempionluğunu rəsmiləşdirməsindən sonra gecə saatlarında Neapol şəhərində atışma baş verib.

"Football-plus.az" xəbər verir ki, insident komandanın minlərlə azarkeşinin iştirak etdiyi bayram tədbirləri zamanı olub.

Yaralılardan biri - 26 yaşlı oğlan təcili Neapoldakı Kardarelli xəstəxanasına çatdırılıb. Lakin həkimlər onun həyatını xilas edə bilməyib. Mərhumun yaxınları onun ölümündən xəbər tutaraq klinikanın şöbələrindən birinə hücum ediblər, binaya ciddi ziyan vurublar. Polis vəziyyətə müdaxilə etməli olub.

Ümumiyyətlə, azarkeşlərin çempionluğu qeyd etməsi zamanı yüzlərlə adam yaralanıb. Yerli mənbələrin məlumatına görə, bazar ertəsinə keçən gecə 203 nəfər müxtəlif xəsarətlərlə xəstəxanalara müraciət edib. 4 nəfər güllə yarası alıb.

Bundan başqa, bıçaq yaraları, atəşfəşanlıq nəticəsində yaranan yanıq yaraları, əzaların və burun çəpərlərinin sınığı, çiyinlərin yerindən çıxması, atəşfəşanlıq və fişənglərin partlaması nəticəsində gözlərin zədələnməsi, yıxılma nəticəsində qançırlar, kəllə-beyin zədələri, panik tutmalarla bağlı faktlar və astmatik status yaşayan şəxslər var.

Bir nəfər isə yüksək dozada kokain qəbulu səbəbindən xəstəxanaya yerləşdirilib.