Bir neçə gün əvvəl Neymarın “Barselona”dan PSJ-yə transferinin şübhəyə yol açdığı məlum olmuşdu. Yerli mənbələr Fransanın hüquq-mühafizə orqanlarının bu məsələni araşdıracağını xəbər vermişdi.

Artıq təhqiqata start verilib. Bu keçid ilə bağlı araşdırmalar çərçivəsində Fransa Maliyyə Nazirliyində axtarış aparılıb.

“Ekip” qəzetinin məlumatına görə, axtarışı Korrupsiya və Vergi Fırıldaqlarına Qarşı Mübarizə üzrə Mərkəzi İdarənin polis əməkdaşları həyata keçirib. Xəbərdə hüquq-mühafizə orqanlarının Neymarın 2017-ci ildə “Barselona”dan PSJ-yə transferini araşdırdığı qeyd olunur. Müvafiq dövlət orqanları PSJ rəhbərliyinin keçid zamanı vergidən yayınmasından şübhələnir.

Xatırladaq Neymar PSJ-də 2017-23-cü illərdə çıxış edib. Paris klubu onu kataloniyalılardan 222 milyon avroya transfer etmişdi. Neymar PSJ-nin heyətində bütün turnirlərdə 173 oyun keçirib və 118 qol vurub. Braziliyalı futbolçu hazırda “Əl-Hilal”da çıxış edir.