Hər ölkə kubokun finalını bayrama çevirməyə çalışır.

Bu yolda həm yarış iştirakçılarının, yəni qarşılaşan komandaların, həm hakimlər briqadasının, həm də turnirin təşkilatçılarının üzərinə böyük yük düşür. Ədalət naminə deyək ki, brendin sahibi olan Peşəkar Futbol Liqası əlindən gələni etdi. Musiqi, şou, Sumqayıta gediş-gəliş üçün jurnalistlərə avtobus ayrılması və s. və i.a. Amma xüsusən də final fitindən sonra meydanda yaşananlar bayram ab-havasına xələl gətirdi.

Tarixdə 3-cü dəfə kubokun finalını qəbul edən Mehdi Hüseynzadə adına stadionda qələbəlik idi. Oyunu tribunalardan 7513 tamaşaçı izləyirdi. “CBC Sport” canlı yayına başlayanda 2-ci liqanın loqosunu göstərdi. Bu telekanalın “Yutub” kanalında oyunu izləyənlərin sayı 13 mindən çox idi.

Topa ilk toxunuşu futbolumuzun əfsanələrindən Nazim Süleymanov etdi, iki sektorda Qazaxıstan bayrağı gördüm. Biri məhz “Soldati di Sabah” olan sektorda idi. “Qarabağ”ın qapısına ilk penalti təyin olunarkən Qurban Qurbanovun köməkçisi Müşfiq Hüseynov uzun-uzadə 4-cü hakim Fərid Hacıyevə etiraz bildirdi. “Qarabağ”ın ikinci qolunda “İmarət Tayfa” pirotexniki vasitədən yararlandı. “Sabah” ikinci qolu vuranda “Soldati da Sabah” da eyni hərəkəti etdi. Oyunun sonluğunun nə qədər gərgin keçdiyi hər kəsə məlumdu. Oyun bitəndən sonra “Qarabağ”ın hücumçusu Musa Qurbanlı İnqilab Məmmədovua çox ağır şəkildə təhqir etdi. İnqilab bəyin cavabı bu oldu: “Sözün qurtardı?”.

Mükafatlandırma mərasimində hakimlər təltif edilərkən “Qarabağ”ın futbolçuları onları ironiya ilə alqışladı. Maraqlıdı ki, ağdamlıların baş məşqçisi Qurban Qurbanov yenə təltif olunmadı. Benzya isə AFFA-nın prezidenti Rövşən Nəcəfin əlini geri çevirərək, gümüş medalı qəbul etmədi. “Sabah” futbolçuları azarkeşlərlə qələbəni qeyd edərkən Tellur Mütəllimov qohumların, dost-tanışın təbrik zənglərinə cavab verirdi.

MÜZƏFFƏR QULUZADƏ