“Azərbaycan kubokunun final matçı üçün “Bakcell Arena”nın seçilməsinin səbəbi stadionun məsafə, azarkeş tutumu, çəkiliş, bir sözlə, texniki durum baxımından ən öndə gedən arenalardan olmasıdı. Təsadüfi deyil ki, burda millinin rəsmi oyunları, klublarımızın avrokubok matçları keçirilib. Həm də “Bakcell Arena”da ölkə kubokunun final qarşılaşması ilk dəfə baş tutacaq. Bilirik ki, mətbuatda son zamanlar daha çox yeni olduğuna görə “Mehdi Hüseynzadə”nin və “Bank Respublika Arena”nın adı çəkilirdi. Bəli, bu stadionlar da gözəl arenalardı. Onu da xatırladım ki, Masazırdakı stadion artıq bir dəfə kubokun finalını qəbul edib. O ki qaldı Sumqayıtdakı arenaya, bu stadionun yenidən qurulması hamımızı sevindirir. Amma stadion hələ qəbul edilməyib və orda matç keçirilməyib. Yəni, test olunmayıb. Növbəti mövsüm hər şey qaydasında olarsa, bu məkan da namizədlər arasında ola bilər”.

“Uzun müddət mətbuatda çalışdığımdan əminəm ki, “Neftçi”nin finala çıxmaq şansları və öz meydanında oynamaq imkanı da müzakirə olunacaq. Amma bu ehtimal seçimdə heç bir rol oynamayıb. Bunun sübutu kimi dəfələrlə stadion öncədən açıqlandıqda belə, məkanın məxsus olduğu klubun qalib olmadığının şahidi olmuşuq. Buna finalın “Bank Respublika Arena”da keçirilən mövsümdə “Sabah”ın öncədən yenilməsini, Qəbələdə baş tutan həlledici qarşılaşmada “Qəbələ”nin “Keşlə”yə məğlubiyyətini nümunə kimi göstərə bilərik”.