Mayın 31-də ölkə kubokunun final oyunu keçiriləcək. Futbol mövsümünə “Qarabağ”la “Sabah” arasındakı görüşlə yekun vurulacaq.

Hələ ki finalın hakimi açıqlanmayıb. Ancaq maraqlı bir detal var. Finala bir neçə gün qalmış iki təcrübəli hakimə oyun tapşırılıb.

Əliyar Ağayev mayın 29-da “Lerik” – “Şirvan”, Elçin Məsiyev isə “Difai” – “Hypers Quba” oyununda iş başında olub. Belə çıxır ki, kubokun finalı bu iki referidən heç birinə tapşırılmayacaq. Belədə Hakimlər Komitəsinin seçim imkanı daralır və ortaya sual çıxır: kubokun finalını kim idarə edəcək?

Məncə, iki real variant var: İnqilab Məmmədov və Kamal Umudlu. İnqilab Məmmədov uzun illərdi ki, premyer-liqada oyun idarə edir. Meydandakı qərarları ilə oyunu nəzarətdə saxlamağı bacaran referidi. Həm AFFA, həm də komandalar üçün risksiz seçim sayıla bilər. Nə beynəlxalq təyinatla yüklənib, nə də son günlərdə hansı oyuna göndərilib. Bu da onu hazır vəziyyətdə olan əsas namizədə çevirir. Amma Kamal Umudlu da nəzərdən qaçmamalıdı. Mövsüm ərzində elitada sabit idarəçilklə yadda qalıb, meydandakı duruşu və qərar vermək qabiliyyəti pis deyil.

Çox güman, final ya İnqilab Məmmədova, ya da Kamal Umudluya həvalə olunacaq.

ƏSƏD SEYİDOV