Ötən yay böyük ümidlərlə ''Beşiktaş''a transfer olunan, amma gözlənilən performansı sərgiləyə bilməyən Çiro İmmobilenin gələcək taleyi ilə bağlı qeyri-müəyyənlik davam edir.

Türkiyə mətbuatının iddiasına görə həm klub, həm də futbolçu yolları ayırmağın əleyhinə deyil. Amma arada birillik müqavilə var. Ona görə də ilk növbədə təzminat məsələsində anlaşmaq lazımdı.

İddialara görə İmmobile menecerinə özünə yeni klub tapmağı tapşırıb. İtaliyalı hücumçu ''ağ-qaralar''a bir illik maaşının bəri başdan verilməsini və bunun müqabilində müqaviləsinin qarşılıqlı şəkildə ləğv olunmasını təklif edib. 35 yaşlı futbolçunun illik qazancı 6 milyon avrodu. Ona görə də rəhbərlik düşünmək üçün vaxt istəyib.

Transfer dəyəri 2,8 milyon avro olan İmmobile geridə qoyduğumuz mövsümdə 41 rəsmi oyuna çıxaraq 19 qol, 4 məhsuldar ötürmə ilə fərqlənib. Amma o, bu 19 qoldan 9-nu penaltidən vurub.

Bu arada İmmobile son paylaşımı ilə diqqət çəkib. O, ''instaqram'' səhifəsinin hekayə bölümündə bu mövsümə aid bir statistik göstəricini paylaşaraq tənqidçilərini susdurmağa çalışıb. Belə ki, İmmobile Türkiyə çempionatında bitiricilik sıralamasında ilk pillədədi. Onun bu mövsüm superliqada ''çərçivə''yə düşən zərbələrinin 65,2 faizi qolla nəticələnib. Təcrübəli futbolçu bu göstəricidə hər kəsi, hətta Viktor Osimheni (58 faiz) də qabaqlayıb.

İmmobile bu paylaşımına göz vurmaq və susmaq emojisini də əlavə edib.