''Beşiktaş''ın mövsümü uğursuz keçirməsinin səbəblərindən biri də hücumçuların məhsuldarlığının aşağı olmasıdı. Bu problem demək olar ki, ötən mövsümdən bəri davam edir.

''Football-plus.az'' xəbər verir ki, 2025-ci ildə İstanbul nəhənglərinin hücumçuları cəmi 3 qol vurublar! Müqayisə üçün bildirək ki, ''Beşiktaş''a lazım olmayan və mövsümün əvvəlində ''Hatayspor''a göndərilən Vensan Abubakar 2025-ci ildə 4 qol vurduğu halda Çiro İmmobile cəmi 2 dəfə qol sevinci yaşayıb. Özü də Avubakarın maaşını hələ də ''ağ-qaralar'' ödəyir!

Yayda ''Beşiktaş''ın böyük ümidlərlə transfer etdiyi təcrübəli italiyalı forvard son həftələrdə əsas heyətdəki yerini də itirib. O, ''Qalatasaray''la derbini əvvəldən sona qədər ehtiyatda keçirdi. Son turda isə Ole Qunnar Sulşer əsas heyətdə ona yox, 17 yaşlı Mustafa Həkimoğluna şans verdi. Halbuki İmmobilenin bir ili ''Beşiktaş''a 10,5 milyon avroya başa gəlir. Bura maaş (6 milyon avro), vergilər (2,5) və imza parası (2) daxildi.

Türkiyə standartlarına görə çox bahalı olan bu futbolçunun superliqada 1 aydan çoxdu, qolu yoxdu. 35 yaşlı futbolçu son qolunu martın 10-da ''Qaziantep''ə vurub.