“Beşiktaş” heyətini təcrübəli futbolçularla zəngilləşdirməkdə davam edir.

Daha öncə Qabriel Paulista ilə Rafa Silvanı heyətinə qatan İstanbul nəhəngi daha bir önəmli transferi bitirmək üzrədi. Son günlərdə “ağ-qaralar”ın “Latsio”nun ünlü forvardı Çiro İmmobile ilə apardığı danışıqlar uğurla nəticələnib. Rafa Silvanın da transferində mühüm rol oynayan ikinci başqan Hüseyn Yücəl özü şəxsən İtaliyaya yollanaraq danışıqları başa çatdırıb. İmmobile dünən İstanbula ayaq basıb. 34 yaşlı futbolçu tibbi müayinədən keçəndən sonra ikiillik müqaviləyə imza atacaq. Maliyyə detalları hələ rəsmi şəkildə açıqlanmasa da, Türkiyə mətbuatının iddiasına görə, “Beşiktaş” bu transfer üçün “Latsio”ya 3 milyon avro ödəyəcək.

İmmobilenin Türkiyədə illik qazancı da təxminən 3 milyon avroya bərabər olacaq. Romalılarla 2026-ya qədər müqaviləsi olan və Səudiyyə Ərəbistanından da ciddi təkliflər alan tanınmış italiyalı forvard üstünlüyü məhz “Qartal”a verib. Qeyd edək ki, “Yuventus”un yetirməsi olan və karyerasına bu klubda start verən İmmobile daha sonra “Syena”, “Qrosseto”, “Peskara”, “Cenoa” və “Torino”da top qovub. Məhz Turin klubunda ulduzu parlayandan sonra 2014-də Dortmund “Borussiya”sına transfer olunub. Amma burda, eləcə də icarə əsasında çıxış etdiyi “Sevilya”da özünü göstərə bilməyib. Ulduz səviyyəsinə isə 2016-da vətəninə qayıdaraq “Latsio”ya transfer olunandan sonra yüksəlib.

2019/20-də A seriyasında 36 qol vurmaqla Qonsalo İquayna məxsus rekordu təkrarlayan futbolçu həmin mövsüm Kriştiano Ronaldo ilə Levandovskini qabaqlayaraq “Qızıl buts” mükafatına sahib çıxmışdı. 4 dəfə A seriyasının bombardiri olan İmmobile “Latsio” tarixinin ən məhsuldar oyunçusu statusundadı. Bu klubda o, 340 rəsmi oyunda 207 qol, 54 məhsuldar ötürmə ilə fərqlənib. Ötən mövsüm İmmobile 43 rəsmi oyuna çıxaraq 11 qol, 1 məhsuldar ötürməlik performans sərgiləyib.