Türkiyə çempionatının son turunda ''Fənərbaxça'' ''Konyaspor''u qəbul etdi.

Oyun turnir cədvəli baxımından heç bir önəm kəsb etməsə də, İstanbul nəhəngi xal itirəcəyi təqdirdə önəmli bir göstərici qeydə alınacaqdı. Çempion ilə ən yaxın izləyicisi arasında 13 xallıq fərq yaranacaqdı ki, bu da turnirin yeni rekordu olacaqdı.

''Konyaspor'' əslində bu rekordun baş tutması üçün əlindən gələn hər şey etdi. Bu komanda məhz ''Fənər''in yetirməsi olan Melih Bostanın erkən qolu ilə fasiləyə üstün yollandı. Qonaqlar bu üstünlüyü 75-ci dəqiqəyə qədər qorumağa müvəffəq olsalar da, sonluğu gətirə bilmədilər.

Bütün oyunu stadiona gələn azsaylı azarkeşlərin ''istefa'' sədaları altında keçirməli olan İstanbul nəhəngi matçın sonlarında dönüş yarada bildi. 75-ci dəqiqədə İrfan Can Kahveci gözəl qol vurdusa, 82-ci dəqiqədə oyunboyu fanatlar tərəfindən fitə basılan Yussef Ən-Nəsiri qələbə qolunun müəllifi oldu. Bu, merakeşli forvardın superliqada 20-ci, bütün turnirləri nəzərə aldıqda isə mövsümdəki 30-cu qolu oldu.

Maraqlıdı ki, 2023-cü ildə ''Qaziantep'' üzərindəki 3:0-lıq texniki qələbəni də nəzərə alsaq, ''Fənərbaxça'' ardıcıl 9-cu mövsümü qələbə ilə tamamladı. Amma bu mövsümlərin heç birində komanda çempion ola bilməyib. Beləliklə, ''Fənər'' mövsümü ''Qalatasaray''dan 11 xal geridə tamamladı.

Bu, turnirin tarixində rekord olmasa da, çempion ilə ən yaxın izləyicisi arasında qeydə alınan ikinci ən böyük fərqdi.

Bu göstəricidə rekord da ''Qalatasaray''ın özünə məxsusdu. 1987/88-də ''Cim-Bom'' ən yaxın rəqibi ''Beşiktaş''ı 12 xal qabaqlayaraq çempion olmuşdu.