Çempionluq şansı möcüzələrə qalan ''Fənərbaxça'' Türkiyə çempionatının 35-ci turunda ''İstanbul BŞ''nin qonağı oldu.

''Football-plus.az'' xəbər verir ki, oyun qonaqlar üçün uğursuz başlaya bilərdi. Amma qapıçı Dominik Livakoviç 20-ci dəqiqədə təcrübəli polşalı forvard Kşiştof Pyontekin penaltisini dəf etməyi bacardı.

Hesab fasilə ərəfəsində açıldı. Ötən tur ''Beşiktaş''la derbidə kobud səhvə yol verərək məğlubiyyətin günahkarlarından birinə çevrilən Mərt Müldür bu dəfə günahını yuyaraq qələbənin əsasını qoydu. İstanbul nəhəngi fasilədən sonra üstünlüyünü bir qədər də möhkəmləndirdi. Ən-Nəsiri ilə Şkrinyarın qolları hesabı darmadağın həddinə çatdırdı.

Son anlarda ''Fənər''in öz yetirməsi olan Ömər Faruk Bəyaz qollardan birinin əvəzini çıxsa da, Oğuz Aydın yenidən fərqi 3 topa çatdıraraq yekun nəticəni müəyyənləşdirdi. ''Fənərbaxça'' bu qələbə ilə ''Qalatasaray''ın çempionluğunu ən azı bir həftəlik təxirə salmış oldu.

Qeyd edək ki, ''Fənər'' Türkiyə çempionatında ''İstanbul BŞ''yə qarşı 6 oyunluq qələbə seriyası yaxalayan ilk kollektiv oldu. ''Sarı-lacivərdlilər''in superliqada ardıcıl 4-cü səfər oyununda ən azı 3 qol vuraraq qalib gəlməsi diqqət çəkdi.

Komandanın sonuncu dəfə belə seriyası 1992 dekabr - 1993 fevral aralığında macarıstanlı mütəxəssis Yozef Venqloşun başçılığı altında olmuşdu.