“Futbolda bəzən qalib gəlirsən, bəzən isə məğlub olursan. Amma əsas fəlsəfə oyunu düzgün oynamaq və qazanmağa çalışmaq olmalıdı. Məşqçi kimi indiyə qədər qazandığım hər şeyə görə məhz bu fəlsəfəyə borcluyam. “Qalatasaray”ın 25-ci çempionluğu və 5-ci ulduzu əldə etməsi məni çox sevindirdi. Onları həmişə ürəkdən dəstəkləyirəm. Bu mövsüm bir çox oyunlarını izləmişəm. Onların əldə etdiyi uğurlarla qürur duyuram. Ötən həftə çempion olduqları matçdan sonra həm Muslera, həm də Morata ilə söhbətləşdim. Mənə çox şey barədə məlumatlar verdilər. Morata cəmi bir neçə ay öncə Türkiyəyə gəlib. Amma indidən iki titul qazanıb. Məncə, indi bu uğurun keyfini çıxarmalıdı. Morata ilə çox yaxın münasibətlərim var. Türkiyədəki gələcəyi onunla klub arasında olan məsələdi. İki tərəf də bir-birindən məmnundusa, yola davam edəcəklər. Bəlkə də start heyətində oynayacağına əmin olmaq istəyir. Amma dünyada heç bir məşqçi heç bir futbolçuya onun yüz faiz əsas heyətdə oynayacağına zəmanət verə bilməz. Digər tərəfdən, futbolçunun da belə zəmanət tələb etməyə haqqı yoxdu. Mən özüm də məşqçi olduğum üçün belə şeyləri gözəl bilirəm. Futbolçu güclüdüsə və yaxşı performans ortaya qoyursa, zatən məşqçi onu start heyətində oynadacaq. Morata “Qalatasaray”da xoşbəxtdi. Amma klubda qalıb-qalmayacağını deyə bilmərəm. Adım bəzi Türkiyə klubları ilə yanaşı hallanır? Mən dedi-qodu və şayiə tipli xəbərlərə reaksiya verməyi sevmirəm. Ciddi bir təklif və layihə gəlsə, onda bu haqda danışmaq olar. Mənim üçün layihənin ciddiliyi və bir klubun inkişaf etmək istəyi əsas meyardı. Təbii ki, Türkiyədən təklif olsa, bunun üzərində düşünə bilərəm. Osimhenə bu qədər çox klubun maraq göstərməsi sürpriz deyil. Çünki “Qalatasaray”da, demək olar, ideala yaxın bir mövsüm keçirdi. Komandaya inanılmaz fayda verdi. Qərarı tam Osimhen özü verməlidi. Ayrılmaq istəsə, “Qalatasaray”ın bunu anlayışla qarşılayacağını düşünürəm. Amma qalmağa qərar versə, bütün camiəni çox sevindirmiş olacaq”.