İnamla liderliyini davam etdirən ''Qalatasaray'' Türkiyə çempionatının 33-cü turunda ''Eyüpspor''un qonağı olacaq.

''Football-plus.az'' az xəbər oyun ''Cim-Bom''un çalışdırıcısı Okan Buruk üçün fərqli məna kəsb edəcək. Belə ki, son 2-3 ildə bir sıra önəmli rekordları yeniləyən mütəxəssis məşqçi kimi Türkiyə çempionatında yubiley - 300-cü oyununa çıxacaq!

Peşəkar futbolçu karyerasını 2010-cu ildə başa vuran, daha sonra bir müddət Türkiyə yığmasında baş məşqçi Abdulla Avcının köməkçisi kimi çalışan Buruk müstəqil məşqçi karyerasına 2013-cü ildə ''Elazığspor''da start verib. Daha sonra ''Qaziantepspor'', ''Sivasspor'', ''Akhisar Bələdiyəspor'', ''Çaykur Rizəspor'' və ''İstanbul BŞ''ni çalışdıran Buruk 2022-dən bu yana ''Qalatasaray''ın başındadı.

O, indiyə qədər ''Elazığspor''da 25, ''Qaziantepspor''da 34, ''Sivasspor''da 11, ''Akhisar Belədiyəspor''da 43, ''Çaykur Rizəspor''da 28, ''İstanbul BŞ''də 54 və ''Qalatasaray''da 104 oyun olmaqla elitada məşqçi kimi 299 oyuna çıxıb. O, 7 fərqli klubun başında çıxdığı bu 299 oyundan 159 qələbə, 59 heç-heçə, 81 məğlubiyyətlə ayrılıb. Yəni ''Qalatasaray'' ''Eyüpspor''u məğlub edəcəyi təqdirdə 51 yaşlı mütəxəssis məşqçi kimi çempionatda 300-cü çempionat oyununda 160-cı qələbəsini qazanacaq.

Maraq üçün bildirək ki, bu, turnirin ən yaxşı 3-cü göstəricisi olacaq. Türkiyə çempionatı tarixində ilk 300 matçda yalnız iki məşqçi - Fatih Terim (180) və Mustafa Dənizli (175) Okan Burukdan daha çox qələbə qazanıb. Amma Buruk həm futbolçu, həm də baş məşqçi kimi ümumilikdə Türkiyə çempionatında ən çox çempionluq yaşamış futbol adamı statusundadı. O, futbolçu kimi 7, məşqçi kimi 3 dəfə olmaqla 10 dəfə bu sevinci yaşayıb.

''Qalatasaray''ın bu il də çempionluğa çox yaxın olduğunu nəzərə alsaq, təcrübəli mütəxəssis özünə məxsus rekordu bir qədər də yeniləməyə yaxındı.